वडा अध्यक्ष रुम्बा कोरोना न्युनिकरण अभियानमा
एक महिना भित्र वडालाई कोरोना संक्रमण मुक्त बनाउने

थाहा नगरपालिका वडा नम्बर ८ का अध्यक्ष टीकाराम रुम्बा लाई ऐले वडाकार्यलयमा भन्दापनि वडाका कोरोना संक्रमित, असक्त, बिरामीको घरतिर भेटिन्छन् ।

बिहान उठ्नेबित्तिकै कोरोना भाइरसबाट बच्न र बचाउन भन्दै माइकिङ गर्ने, बिरामीको अवस्था बुझ्ने, स्वास्थ्य सामग्री हस्तान्तरणगर्ने काम रुम्बाको दिनचर्या हुन थालेको छ ।

दोस्रो चरणको कोरोना भाइरसको प्रकोप भएदेखि रुम्बाले धेरै छाक बिहानको खाना खाएका छैनन् । वडा अध्यक्ष रुम्बा भन्नुहुन्छ ‘सबैजना सुरक्षित हुनुपर्ने छ, आफ्नै कारणले पनि अरुलाई संक्रमण होला, संक्रमितहरुको अवस्था बुझ्न र सचेतना फैलाउन टोलटोलमा पुग्दा खाना खान घर आउन भ्याइन्न, अन्त खान संक्रमणको डर ।’ रुम्बाले भन्नुभयो ‘त्यसैले एकमाना भुटेको भटमास र एक बोत्तल पानी घरबाटै झोलामा बोकेर हिड्छु । जहाँ भोक लाग्छ तेहि भटमास र पानी खान्छु ।’

आईतबार अध्यक्ष रुम्बाले आफ्नै खर्चमा एकजना संक्रमितलाई एकमहिनालाई पुग्ने खाद्यान्न सहयोग पनि गर्नुभयो । निम्न आय भएका कोरोना संक्रमितलाई एक महिनालाई पुग्ने खाद्यान्न घरमै पुर्याउनु भयो  । 
घरको कमाई गर्ने मुख्य मान्छेनै संक्रमित भएपछि घरमा चुलो नै नबल्ने स्थिति भएकोले खाद्यान्न सहयोग गरेको अध्यक्ष रुम्बाले बताउनुभयो ।रुम्बाले ३० किलेको एक पाकेट चामल, २ लिटल तेल, २ किलो दाल २ किलो चना २ किलो चिनी २ किलो चिउरा, साबुन एक थान, चियापत्ति एक प्याकेट, माक्स १५ पिस, १०० मिलिलिटरको सेनिटाईजर एक पिस सहयोग गर्नु भएकोछ । 

बिपदमा वडाका नागरिकको सुरक्षा गर्नु वडाको महत्वपूर्ण काम ठानी बडाका सबै नागरिक सुरक्षित बनाउनको लागि दिन रात नभनी बडा अध्यक्ष लगायत जनप्रतिनिधिहरु लागिपरेकोले कोरोना परास्त गर्नमा हिम्मत बढेको एक संक्रमितले बताउनुभयो ।

अबको १ महिना भित्रमा वडालाई कोरोना संक्रमण मुक्त बनाउने अभियानमा लागेको अध्यक्ष रुम्बाले बताउनुभयो । 

हालसम्म थाहा ८ मा ७२ जना कोरोना संक्रमित भएकोमा २५ जनाले कोरोना जितिसकेका छन् । ४७ जना संक्रमित घरमै आईसोलेसनमा रहेको र सबैको स्वास्थ्य अवस्था सामान्य रहेको वडा सदस्य सुमन कार्कीले बताउनुभयो ।