मकवानपुरमा ४ हजार बढीलाई पुग्ने कोभिसिल्ड खोप हरायो 

८, असार । मकवानपुरमा ४ सय १ भाइल कोरोना विरुद्धको कोभिसिल्ड खोप गायव भएको छ ।
जिल्ला स्वास्थ्य कार्यालय मकवानपुरले दिएको तथ्याङ्कमा मकवानपुरका लागि प्राप्त भएको कुल ३ हजार ३ सय ३० भाइल खोप मध्ये ४ सय १ भाइल खोप हराएको हो । १ भाईल बराबर १० डोज खोप हुन्छ ।

जिल्लामा कोभिसिल्ड खोपको पहिलो र दोस्रो मात्रा लगाउन कुल २ हजार ८ सय ८३ भाइल खोप खपत भएको जिल्ला स्वास्थ्य कार्यालय मकवानपुरको तथ्याङ्कमा उल्लेख गरिएको छ ।

हाल जिल्ला स्वास्थ्य कार्यालय मकवानपुरको स्टकमा ९० भाइल खोप बाँकी छ । 

दुवै तथ्याङ्क जोड्दा २ हजार ९ सय २८ भाइल खोप  रहेको देखिन्छ भने बाँकी ४ सय १ भाइल खोप स्वास्थ्य कार्यालय मकवानपुरबाट हराएको छ । ४ सय १ भाइल खोपको कुनै अभिलेख भेटिएको छैन ।

जिल्ला स्वास्थ्य कार्यालय मकवानपुरले स्थानीय पालिकाहरुलाई पठाउको खोपको तथ्याङ्क लुकाउँदा तथ्याङ्कमा फरक परेको जनाएको छ । 

केही खोप भण्डारणमा समस्या हुँदा नष्ट भएको र केही खोप खसेर फुटेकाले तथ्याङ्क फरक परेको जिल्ला स्वास्थ्य कार्यालय मकवानपुरका सूचना अधिकारी लक्ष्मण घिमिरेले बताए । 

‘पालिकाहरुबाट खोप लगाएकाको पुरा विवरण प्राप्त नभएको, केही खोप खसेर फुटेको र भण्डारण गर्न समस्या हुँदा खोप नष्ट भएको हुन सक्छ,’ उनले भने ।

१४ हजार ७ सय २३ जना दोस्रो मात्राबाट बञ्चित

मकवानपुरमा १४ हजार ७ सय २३ जना नागरिक कोरोना विरुद्धको कोभिसिल्ड खोपको दोस्रो मात्रा लिन पाएका छैनन् ।

गत माघदेखि चेतसम्म विभिन्न चरणमा संचालन भएको खोप कार्यक्रममा खोप सेवा लिएका २१ हजार ४ सय ३ जना मध्ये ६ हजार ९ सय ८० जनाले मात्र कोरोना विरुद्धको ९कोभिसिल्ड० खोपको दोस्रो मात्रा लगाएका छन् ।  
बाँकी १४ हजार ७ सय २३ जना नागरिक कोरोना विरुद्धको ९कोभिसिल्ड० खोपको दोस्रो मात्रा लिनबाट बञ्चित छन् । 

गत माघ २ गतेदेखि हालसम्म मकवानपुरका लागि कुल ३ हजार ३ सय ३० भाइल कोभिसिल्ड खोप प्राप्त भएको र जिल्ला स्वास्थ्य कार्यालय मकवानपुरमार्फत जिल्लाका १० वटै स्थानीय तहमा वितरण गरेर खोप कार्यक्रम संचालन गरिएको थियो ।

कोरोना नियन्त्रणमा खटिएका फ्रन्टलाइनर र लक्षित वर्गका लागि प्राप्त भएको उक्त खोप अभाव हुँदा पहिलो मात्रा खोप लगाएका व्यक्तिहरु समस्यामा परेका छन् । 

जिल्ला स्वास्थ्य कार्यालय मकवानपुरको तथ्याङ्क हेर्ने हो भने मकवानपुरका गत माघ १४ गतेदेखि २८ गतेसम्म २ हजार १ सय ६६ जना, फागुन २ गतेदेखि ९ गतेसम्म २ हजार ७ सय ७२ जना, फागुन २३ गतेदेखि चैत १७ गतेसम्म १६ हजार १ सय ५८ जना र चैत १७ पछि हालसम्म ३ सय ७ जनाले कोभिसिल्ड खोपको पहिलो मात्रा लगाएका छन् । 

कोरोना विरुद्धको कोभिसिल्ड खोपको पहिलो मात्रा लगाएको १६ हप्ता भित्रमा दोस्रो मात्रा लगाइसक्नु पर्ने हुन्छ तर मकवानपुरमा पहिलो मात्रा लगाएर १६ हप्ता काटिसकेका फ्रन्टलाइनर र लक्षित वर्गले नै दोस्रो मात्रा लगाउन पाइरहेका छैनन् ।

रातोपाटीबाट