मकवानपुरमा कोरोना संक्रमण मुक्त हुनेको संख्या बढ्दै

स्वास्थ्य कार्यलय मकवानपुरले सोमबार सार्वजनिक गरेको आँकडा अनुसार जिल्लामा कोरोना भाइरस संक्रमणमुक्त हुनेको संख्या बढ्दै गएको छ ।

आज मात्रै २ सय २४ जना संक्रमित कोरोना मुक्त भई डिस्चार्ज भएका छन् । पछिल्लो २४ घण्टामा जिल्लामा होम आइसोलेसनबाट २ सय १६ जना र आइसोलेसनबाट १२ जना गरी २ सय २४ जना संक्रमणमुक्त भएका हुन् । आईतबार जिल्लामा १ सय ८३ जना कोरोनामुक्त्त भएका थिए ।

यससंगै मकवानपुरमा कोरोना जित्नेको संख्या ७८ दशमलव ६२ प्रतिशत नाघेको स्वास्थ्य कार्यलय मकवानपुरले जनाएको छ । कुल संक्रमितको संख्या ९ हजार ४ सय २३ पुग्दा मकवानपुरमा ७ हजार ४ सय ९ जनाले कोरोना जितेका छन् ।

स्वास्थ्य कार्यालयका अनुसार हेटौंडा उपमहानगरपालिकामा ५ हजार ९ सय १९, मनहरी गाउँपालिकामा ४ सय ३२, थाहा नगरपालिकामा ३ सय ९७, मकवानपुरगढी गाउँपालिका १ सय ८०, भिमफेदी गाउँपालिकामा १ सय ६०, बागमती गाउँपालिकामा १ सय, कैलाश गाउँपालिकामा ८०, बकैंया गाउँपालिका ६६, राक्सिराङ गाउँपालिकामा ४० र इन्द्रसरोबर गाउँपालिकामा ३३ सङ्क्रमणमुक्त भएका छन् ।

यसैगरि जिल्लामा पछिल्लो २४ घण्टामा थप ९२ जनामा कोरोना पुष्टि भएको छ । १ सय १० जनाको पिसिआर परीक्षण गर्दा ५० जना र ३ सय २६ जनाको एन्टीजेन परीक्षण गर्दा ४२ जनामा गरी थप ९२ जनामा कोरोना पुष्टि भएको हो ।आईतबार मकवानपुरमा ८४ जनामा कोरोना संक्रमण पुष्टि भएको थियो ।

यससंगै मकवानपुरमा हालसम्म संक्रमण पुष्टि हुनेको संख्या ९ हजार ४ सय २३ जना पुगेको छ भने  १ हजार ८ सय ९५ जना सक्रिय संक्रमित छन् । जसमा होम आइसोलेशनमा १ हजार ७ सय ८९ जना र संस्थागत आइसोलेशनमा १ सय ६ जना उपचाररत रहेको स्वास्थ्य कार्यलय मकवानपुरले जनाएको छ ।