बेतिनीमा खुर्पा प्रहारबाट एक जनाको मृत्यु, स्वास्थ्य चौकीका कर्मचारी पक्राउ

मकवानपुर, असार १४ गते
मकवानपुर जिल्लाको बागमती गाउँपालिका–९ स्थित बेतिनीमा आज बिहान एक व्यक्तिको धारिलो हतियार खुर्पा प्रहारबाट मृत्यु भएको छ। घटनामा संलग्न रहेको अभियुक्तलाई प्रहरीले नियन्त्रणमा लिएको छ।

इलाका प्रहरी कार्यालय फापरबारीका अनुसार आज २०८२ साल असार १४ गते बिहान अन्दाजी ५ बजे बेतिनीमा बसोबास गर्दै आएका करिब ५७ वर्षीय रामबहादुर वाइवालाई सोही वडाको बेतिनी स्वास्थ्य चौकीमा कार्यरत कार्यालय सहयोगी कुमार थापाले खुर्पाले प्रहार गरी गम्भीर घाइते बनाएका थिए। थापा बारा जिल्ला निजगढ नगरपालिका–३ सिंगोल निवासी हुन्।

स्थानीयवासीका अनुसार खुर्पा प्रहारपश्चात थापा घटनास्थलमै रहेर नजिक जो कोही आए पनि मार्ने धम्की दिँदै बसिरहेको बताइएको छ। घटनाको जानकारी बिहान करिब ६:३० बजे इलाका प्रहरी कार्यालय फापरबारीमा प्राप्त भएपछि प्रहरी टोली तत्कालै घटनास्थलमा खटिएको थियो।

प्रहरी टोलीले अभियुक्त कुमार थापालाई नियन्त्रणमा लिएको छ। घाइते वाइबाको घाटीमा गहिरो चोट लागेको बताइएको छ। घटनाको थप अनुसन्धानका लागि प्रहरी निरीक्षक पावल सिंह लामाको नेतृत्वमा ६ जनाको टोली घटनास्थलमा परिचालन गरिएको छ।

बिहान ७:४५ बजे बेतिनी स्वास्थ्य चौकीकै चिकित्सकले रामबहादुर वाइवालाई मृत घोषणा गरेका छन्। हाल मृतकको शव पोष्टमार्टमका लागि हेटौंडा अस्पताल पठाइएको छ। घटनाबारे थप अनुसन्धान भइरहेको प्रहरीले जनाएको छ।