निःशुल्क स्वास्थ्य शिविरबाट टिष्टुङका ३६० जना महिलाहरु लाभान्वित

वीङ युथ, थाहा नगरपालिकाको कार्यालय र थाहा नगरपालिका वडा नं. ११ र १२ को सयुक्त आयोजनामा जेठ २२ गते थाहा ११ र १२ का महिलाहरुलाई लक्षित गरी संचालन गरेको निःशुल्क स्वास्थ्य शिविरबाट ३६० जना महिलाहरु लाभान्वित भएका छन । 

स्वास्थ्य शिविरमा ३४० जना महिलाहरुको निःशुल्क भिडियो एक्सरे र ९७ जनाको पाठे घरको मुखको क्यान्सर जाँच गरेको वीङ युथको कार्यक्रम संयोजन आशिका बस्न्यातले बताए । सो शिविरमा ९ जना महिलाहरुको पाठेघर खस्ने समस्या देखिएको हुँदा रिङ पेसरी राखी उपचार गरेको र २ जना महिलाको पूर्ण रुपमा पाठेघर खसेको हुँदा काठमाडौं पठाइएको डा. पवन कार्कीले जानकारी दिए । शिविरमा ३० देखि ५० वर्षका महिलाहरुलाई पाठेघरको मुखको क्यान्सर जाँच गरिएको कार्कीले बताए ।

सो शिविरमा बरिष्ट स्त्री रोग विशेषज्ञ डा. विना श्रेष्ठ, बरिष्ट रेडियोलोजिष्ट डा. अनुज बज्राचार्य, डा. गगन कार्की, डा. पवन कार्की, रजिष्टर नर्स जस्मिन गुरुङ, रजिष्टर नर्स सस्मिता राई, रजिष्टर नर्स सुजता गुरुङ, अनुसा लामा, फार्मेसिस्ट सुमन खड्का, नर्सिङ स्वय्सेवक आशिका के.सी., गरिमा बस्नेत लगायतको स्वास्थ्यकर्मीहरुले सहभागिता रहेको थियो । 

यस अघि पनि वीङ युथ र थाहा नगरपालिकाको आयोजनामा थाहा ७ र ८ का महिलाहरुलाई लक्षित गर्दै निःशुल्क शिविर भएको थियो । थाहा नगरपालिका महिलाहरुलाई पाठेघरको क्यान्सर सम्वन्धी समस्यालाई निराकरण गर्ने उद्देश्यले शिविरलाई निरन्तरता दिदै आइरहेको र आउँदा दिनहरुमा अन्य वडाहरुमा शिविर संचालन गर्दै जाने वीङ युथको संयोजक बस्न्यातले जानकारी दिए ।