थाहा नगरपालिकामा भोलि र पर्सि मुटु रोग सम्बन्धी निःशुल्क स्वास्थ्य शिविर हुने

थाहा नगरपालिकाको आयोजना र नेपाल हृदय रोग निवारण प्रतिष्ठान मकवानपुरको सहयोगमा थाहामा दुई दिने मुटु रोग सम्बन्धी निःशुल्क स्वास्थ्य शिविर आयोजना हुने भएको छ। "मुटुलाई धडकन दिऔँ" भन्ने नाराका साथ आयोजना हुने यो शिविर कार्तिक २८ र २९ गतेका दिन पालुङ प्राथमिक स्वास्थ्य केन्द्र, थाहा–४ मा सञ्चालन हुनेछ।
शिविरमा मुटु रोग तथा जनरल फिजिसियन सेवासँगै थप निःशुल्क परीक्षण सेवा जस्तै ECG, ECHO, USG, PFT र सुगर परीक्षण उपलब्ध गराइनेछ। साथै, १५ दिनका लागि निःशुल्क औषधिको व्यवस्था र दन्त उपचार सेवा पनि रहनेछ।
शिविरमा सिनियर जनरल तथा फिजिसियन डाक्टर प्रा. डा. सुमन कर्माचार्य र मुटुरोग विशेषज्ञ प्रा. डा. मनोज श्रेष्ठ (कार्डियोलोजिष्ट) ले परामर्श दिनेछन्।
शिविर विहान १० बजेदेखि बेलुकी ४ बजेसम्म सञ्चालन हुनेछ।
कार्यक्रमको आयोजक थाहा नगरपालिका, सहयोगी नेपाल हृदयरोग निवारण प्रतिष्ठान थाहा नगरपालिका इकाई रहेका छन्। साथै, पालुङ प्राथमिक स्वास्थ्य केन्द्रले प्राविधिक सहयोग रहने प्रतिष्ठानका थाहा इकाई अध्यक्ष बिमलकुमार ढकालले जानकारी दिए।
यो शिविरबाट मुटु रोगसम्बन्धी उपचार र सचेतनामा टेवा पुग्ने आयोजक पक्षले जनाएको छ।