थाहा नगरका विद्यालयहरुको एसईई नतिजा सार्वजनिक:- हेर्नुस नतिजा

थाहा नगरपालिका, मकवानपुर — माध्यमिक शिक्षा परीक्षा (एसईई) २०८१ को नतिजा सार्वजनिक भएपछि थाहा नगर क्षेत्रका विद्यालयहरुको समग्र परिणाम सार्वजनिक गरिएको छ। सार्वजनिक विवरण अनुसार निजी विद्यालयहरुले उच्च सफलता दर कायम गरेका छन् भने सार्वजनिक विद्यालयहरुको नतिजा तुलनात्मक रुपमा कमजोर देखिएको छ।

थाहा नगरपालिका अन्तर्गत १८ वटा माध्यमिक विद्यालयबाट ४९५ जना विद्यार्थी परीक्षा दिएका थिए। तीमध्ये २१७ जना मात्र ग्रेडसहित उत्तीर्ण भएका छन्। समग्र ग्रेडिङ प्रतिशत ४४.२९% मा सीमित रहेको छ।

सबैभन्दा राम्रो नतिजा पालुङ मोर्डन इङ्लिस स्कुल थाहा-१ ले हासिल गरेको छ। यहाँका ४ वटै विद्यार्थी उत्तीर्ण भई १०० प्रतिशत सफलता दर देखिएको छ। त्यसपछि पालुङ भ्याली हर्ट एकेडेमी, थाहा-३ ले ८५ प्रतिशत र इअन इङ्लिस स्कुल थाहा-६ ले ७५ प्रतिशत सफलता दर हासिल गरेका छन्।

निजी विद्यालयहरुमध्ये अधिकांशले ७० प्रतिशतभन्दा माथिको नतिजा ल्याएका छन्।

विपरीत, अधिकांश सार्वजनिक विद्यालयहरुको सफलता दर ५० प्रतिशतभन्दा तल देखिएको छ। सामुदायिक तर्फ झम्केश्वरी मावि, थाहा-१ मा ३१ विद्यार्थीमध्ये १३ जना मात्र उत्तीर्ण (४१.९३%), मत्स्यनारायण मावि, थाहा-२ मा ३२ मध्ये १४ जना (४३.७५%) र सुनौला मावि, थाहा-१ मा २१ मध्ये ९ जना (४२.८६%) मात्र ग्रेड प्राप्त गर्न सफल भएका छन्।
जनकल्याण मावि प्राविधिक धार तर्फ  १६ मध्ये ६ जना मात्र उत्तीर्ण (३७.५०%) र साधारण तर्फ ४१ मा १३ जना उतिर्ण भए ।

समग्रमा, यस वर्ष पनि निजी विद्यालयहरुको नतिजा सार्वजनिक विद्यालयभन्दा धेरै उत्कृष्ट देखिएको छ। थाहा नगरपालिकाका शिक्षा क्षेत्रका सरोकारवालाहरुले सार्वजनिक विद्यालयमा सुधारका लागि नीतिगत परिवर्तन र शैक्षिक लगानी आवश्यक रहेको बताएका छन्।

नगरपालिकाले सबै विद्यालयको विश्लेषणात्मक नतिजा आधारमा सुधारका कार्यक्रम अघि बढाउने तयारी गरेको जानकारी दिएको छ। हेर्नुस नतिजा