थाहा–काठमाडौं सवारी अवरोध हट्यो, पीडित पक्ष र नारायणी संघबीच सहमति

थाहा नगरपालिका 
थाहा नगरपालिका वडा नं. ९ का स्थायी बासिन्दा  कृष्ण बलामी लगायत थाहा १ झम्केश्वरी माबिका दुई शिक्षकको  जेठ १२ गते  थाहा ३ त्रिभुवन राजमार्ग अन्तर्गत स्कुलचोकमा बा ३ ख ५९९० नम्बरको बसको ठक्करबाट दुःखद निधन भएपछि उत्पन्न परिस्थितिलाई लिएर स्थानीयबासी, पिडित पक्ष, सवारीधनी, नारायणी यातायात व्यवसायी संघ तथा सरोकारवालाबीच आज ईलाका प्रहरी कार्यालय, पालुङ्गमा आपसी छलफल सम्पन्न भएको छ। छलफलबाट आपसी सहमति भएपछि यसअघिको सवारी आवागमनमा लगाइएको प्रतिबन्ध फुकुवा गरिएको हो।

घटनापछि स्थानीय मागलाई सम्बोधन गर्दै वडा कार्यालयले मिति २०८२ जेठ १३ गतेदेखि चित्लाङ–चन्द्रागिरी–थानकोट (गणेशमान सिंह मार्ग) हुँदै काठमाडौं आवतजावत गर्ने भाडाका सवारीसाधनमाथि अस्थायी रूपमा रोक लगाएको थियो। तर आज सम्पन्न छलफलमा पिडित पक्षसँग सहमति भएपछि भोलिदेखि अर्थात् जेठ २० गते मंगलबारबाट सो सडकखण्डमा नारायणी यातायात व्यवसायी संघ अन्तर्गतका सबै सार्वजनिक सवारी साधन सञ्चालनमा कुनै अवरोध नरहने वडा कार्यालयले जनाएको छ।

साथै नारायणी यातायात व्यवसायी संघले सो सडकखण्डमा अस्थायी रुट इजाजतका लागि थाहा नगरपालिका कार्यालयमा पत्राचार गरिसकेको जानकारी दिइएको छ। त्यसका आधारमा नगरपालिका कार्यालयले जिल्ला प्रशासन कार्यालय, मकवानपुरसँग समन्वय गर्दै अस्थायी रुट इजाजतका लागि प्रक्रिया अघि बढाइसकेको र स्थायी रुट परमिटका लागि समेत चाँडै आवश्यक पहल गरिने जनाइएको छ।

थाहा नगरपालिका वडा नं. ९ कार्यालयले स्थानीयवासी, यात्रु तथा सरोकारवाला सबैलाई यो जानकारीका लागि सार्वजनिक सूचना जारी गरेको छ।
हेर्नुस सूचना