थाहामा प्रशासनको निर्णय अनुसार निशेधाज्ञा हुने
जिल्ला प्रशासन कार्यालयले जेठ ३१ गते सम्म निशेधाज्ञा थप गर्ने

थाहानगरस्तरीय कोभिड रोकथाम तथा नियन्त्रण निर्देशन समितिको १९ जेठमा बसेको बैठकले नगरमा अझै कोरोना संक्रमणको जोखिम कायमै रहेको भन्दै जिल्ला प्रशासन कार्यालयले जारी गर्ने निर्देशन अनुसार नै निषेधाज्ञा हुने निर्णय गरेको छ । 

नगर प्रमुख लवशेर विष्टको अध्यक्षतामा बसेको बैठकले निषेधाज्ञालाई पूर्ण पालना गर्न आग्रह गर्दै अब हरेक संक्रमितको  स्वास्थ्य अवस्था बुझेर नगरमा जानकारी गराउन वडाहरुमा निर्देशन दिने निर्णय गरेको छ । घरघरमा पुग्ने प्रतिनिधिले कोरोना संक्रमित बिरामीलाई १५ वटा सर्जिकल मास्क र एउटा साबुन वितरण गर्ने समेत निर्णय गरेको छ ।

त्यस्तै मकवानपुर जिल्ला प्रशासन कार्यालयले भने जेठ ३१ गते सम्म निशेधाज्ञा थप गर्ने निर्णय गरेको छ । प्रमुख जिल्ला अधिकारी भरतमणि पाण्डेको अध्यक्षतामा बुधबार बसेको बैठकले निषेधाज्ञालाई ११ दिन थप गरी ३१ सम्म थप गर्ने निर्णय गरेको हो ।

त्यस्तै केन्द्रको बैठकले अत्यावश्यक सेवा, तरकारी, फलफूल, दुग्ध पदार्थ, खाद्यान्न लगायतका सामग्री बिक्री वितरण गर्ने पसल तथा व्यवसाय निश्चित समय सञ्चालन गर्ने दिने निर्णय गरेको जिल्ला प्रशासन कार्यालय मकवानपुरका सूचना अधिकारी देवचन्द्र गर्तौलाले जानकारी दिए ।

उहाँका अनुसार ती क्षेत्र विहान ८ बजेसम्म सञ्चालन गर्न पाइनेछ भने खोपे गल्लीको तरकारी पसल र बसपार्कको तरकारी मण्डी पूर्ण रुपमा बन्द गर्ने निर्णय भएको छ ।  बैठकले बैंक, मनी ट्रान्फरला हरुको हकमा भने स्वास्थ्य सुरक्षाका मापदण्ड अपनाएर साताको ३ दिन आइतबार, मंगलबार र बिहीबार बिहान १० बजेदेखि २ बजेसम्म सञ्चालन गर्न दिइने भएको छ र अन्य वित्तीय कारोवार गर्ने संघ संस्था तथा सहकारीहरू पूर्ण रुपमा बन्द गर्नुपर्ने निर्णय गरेको सुचना अधिकारी गर्तौलाले बताए ।

बैठकले खानेपानी आपूर्ति, फोहोरमैला व्यवस्थापन, विद्युत, पशुपंछीको दाना, कृषि उपज, बीउबिजन, रासायनिक मल तथा कृषि औजार ढुवानी गर्ने सवारी साधनहरु पनि सञ्चालन गर्न दिने निर्णय गरेको छ ।  यस्तै कामदार कर्मचारीलाई उद्योग परिसरमै आवासीय व्यवस्था मिलाएर वा घरबाटै लाने लैजाने व्यवस्था गरेर उद्योग सञ्चालन सक्ने बैठकले निर्णय गरेको छ ।