थाहानगरको नाकामा ३८ सयको स्वास्थ्य परीक्षण

थाहा नगरपालिकाले नगरका नाकाहरुमा स्थापना गरेको हेल्थ डेस्कमा अहिलेसम्म ३८ सय व्यक्तिहरुको स्वास्थ्य परीक्षण गरिएको छ ।

गत चैत १३ गतेयता थाहा नगरको नाकाहरुमा राखिएको हेल्थ डेस्कमा बिहीबारसम्म ३८ सय १२ जनाको स्वास्थ्य परीक्षण गरिएको थाहा नगरपालिकाको कोरोना रोकथाम तथा नियन्त्रण समन्वय समितिको सचिवालयले जनाएको छ । 

सचिवालयले उपलब्ध गराएको तथ्याङकअनुसार अहिलेसम्म थाहा नगरको चित्लाङ नाका भएर आउजाउ गर्ने सबैभन्दा धेरै व्यक्तिहरुको परीक्षण गरिएको छ । चित्लाङको पौवा हेल्थ डेस्कमा अहिलेसम्म २२ सय ३६ जनाको परीक्षण गरिएको छ । त्यस्तै, सीमभन्ज्याङ हेल्थ डेस्कमा नौ सय ९३ र इलाका प्रहरी कार्यालय हेल्थ डेस्कमा पाँच सय २७ जनाको परीक्षण गरिएको छ । आग्राको भोर्ले हेल्थ डेस्कमा ५६ जनाको स्वास्थ्य परीक्षण गरिएको छ । 

यी ४ वटै डेस्कहरुमा गरी विहीबार मात्र एक सय १५ जनाको स्वास्थ्य परीक्षण गरिएको थियो । चित्लाङमा ८, इलाका प्रहरीमा ५३ र सीमभन्ज्याङमा ५४ जनाको परीक्षण गरिएको सचिवालयले जनाएको छ । विहीबार परीक्षण गर्दा थाहानगर भित्रिने र बाहिरिने कसैमा पनि जरो नदेखिएको थाहा नगरपालिकाका स्वास्थ्य शाखा प्रमुख मेघराज बलामीले जानकारी दिए ।