थाहानगरका एक संक्रमितको कोरोना कथा
दुबईमा नेगेटिभ, नेपालमा पोजिटिभ

दुबई गएको एक वर्ष नवित्दै विश्वभर कोरोना फैलियो । नेपालमा लकडाउन घोषणा गरेको दुई दिनपछि अर्थात् मार्च २६ तारिखबाट दुबईमा लकडाउन शुरु भयो । म होटलमा काम गर्थें, लकडाउन घोषणा भएसँगै होटल बन्द भयो । त्यसपछि हामी बेरोजगारप्रायः भयौं । सरकारले बैदेशिक रोजगारमा गएकाहरुलाई नेपाल ल्याउने भए पछि खुसी लाग्यो । त्यही मेसोमा मैले पनि आवेदन दिएँ । नेपाल आउनुअघि पिसिआर परीक्षण गराएँ । रिपोर्ट नेगेटिभ आयो । त्यही प्रमाण लिएर म अगष्ट ९ तारिख अर्थात् साउन २५ गते काठमाण्डौंस्थित बिमानस्थल ओर्लिएँ । केहीबेर होल्डिङ सेन्टर राखेपछि मलाई त्यही दिन मकवानपुरस्थित थाहा नगरपालिकाको क्वारेन्टाइनमा लगियो । 

म ३० वर्षीय युवक हुँ । मेरो घर थाहा नगरपालिकाको वडा नं. २ मा पर्दछ । क्वारेन्टाइनको सुविधा राम्रै थियो । क्वारेन्टाइनमा बसेको ४ दिनपछि डाक्टरहरु आएर स्वाब लिनुभयो । स्वाब लिएको एक हप्तापछि बल्ल रिपोर्ट आयो । रिपोर्टमा कोरोना भाइरस नेगेटिभ आएपछि मलाई क्वारेन्टाइनबाट विदा गरियो । रिपोर्ट नेगेटिभ आए पनि एक हप्तासम्म घरमै बस्न भनिएको थियो । सोही अनुसार घरमै बसिरहेको थिएँ । घरमै रहँदा केही साथीहरु विदेशबाट फर्किएको भन्दै भेट्न आएका थिए । घर आएको भोलिपल्टै मलाई फोन आयो, सायद डाक्टरले नै गरेको हुनुपर्छ । ‘तपाईंको रिपोर्टमा कोरोना पोजिटभ आएको छ, हिजो तपाईंकै नामको अर्को व्यक्तिको रिपोर्ट आएको रहेछ, अब तपाई आइसोलेसनमा जानु पर्ने भयो, तयार रहनुस्’ फोनमा भनेको केही बेरमा घरमा प्रहरीहरु आइपुगे । म आइसोलेसनमा जान तयार भएँ । मेरो सम्पर्कमा रहनुभएका मेरो बुबा र अरु साथीभाइ तथा आफन्त गरी ६ जनालाई कन्ट्याक्ट ट्रेसिङको आधारमा क्वारेन्टाइनमा लैजाने तयारी गरियो । क्वारेन्टाइनबाट नेगेटिभ भनेर विदाइ गरेपछि म घरसम्म आउँदा दुईवटा अटो चढेको थिएँ, उनीहरुलाई पनि सम्पर्क गरेर क्वारेन्टाइनमा लैजाने तयारी गरियो ।

 
आइसोलेसनमा ‘रुम’ खचाखच, हामी हलमा
अहिलेसम्म थाहा नगरपालिकामा कोरोना संक्रमितलाई राख्ने आइसोलेसन छैन । त्यसैले अरु संक्रमितहरुलाईजस्तै मलाई पनि हेटौंडा लगियो । हेटौंडाको गौरीटार भन्ने ठाउँमा केही दिन अघिबाट मात्र आइसोलेसन संचालन गरिएको रहेछ । मसँगै दुबइबाट आएका अर्को एकजना कोरोना पोजिटिभ व्यक्ति पनि हुनुहुन्थ्यो । आइसोलेसनमा रुम खचाखच भएको भन्दै हामीलाई हलकै बेडमा राखियो । एउठा टूलो हल छ, हलमा ३ वटा बेडमा छन् । बेडमा दुईवटा तह छन् । हामी यही हलमा बसेका छौं । अहिले हामी एउटै हलमा ३ जना छौं, एक दिन त ५ जनालाई राखिएको थियो । हेटौंडा आइसोलेसनमा बसेको आज ९ दिन भयो । 

उपचार ? दूध–बेसार
आइसोलेसनमा बसेको ९ दिन वित्दा शुरुमा एकपटक ज्वरो जाँचिएको बाहेक अहिलेसम्म उपचार केहो भन्ने थाहा पाउन सकिएको छैन । कहिलेकाहिँ नर्सहरुले १५ मिटरजति टाढैबाट सोध्नहुन्छ । केही समस्या भए त्यही समयमा भन्ने हो । खाने, बस्ने र सुत्ने काम मात्र भएको छ । थाहा नगरबाट आएयता अहिलेसम्म यहाँ फेरि स्वाब लिइएको छैन । विहान ८ बजे खाजा, १० बजे खाना, ३ बजे खाजा र बेलुका ८ बजेतिर खानाको व्यवस्था छ । हेटौंडाकै संक्रमित साथीहरुको घर नजिकै भएकोले कहिलेकाहिँ घरबाट बेसार ल्याइदिँदा रहेछन् । साथीहरु दूध र बेसार सेवन गर्छन् । 

सौचालय साझा, सरसफाइ आलोपालो
आइसोलेसनमा एउटा प्mलोरको लागि एउटा सौचालय छ । महिला र पुरुषको अलग अलग छ । हाम्रो हलको लागि पनि एउटै साझा सौचालय र बाथरुम छ । सबैले त्यही प्रयोग गर्ने हो । सरसफाइको काम हाम्रै हो । सरसफाइका लागि हामीले नै पालो सिस्टम राखेका छौं । पानीको अभाव छैन । सावुनलगायतको सरसफाइ सामग्री आइसोलेसन व्यवस्थापनले उपलब्ध गराउँछ । 

घरमै भर, आइसोलेसनमा डर
दुबईबाट नेपाल आएर क्वारेन्टाइन हुँदै आइसोलेसनमा बसेको यतिका दिन हुँदासम्म मलाई न खोकी, न ज्वरो । कोरोना संक्रमणको लक्षणहरु कुनै छैनन् । मलाई अहिले पनि केही संक्रमण भएकै छैन भन्ने लागिरहेको छ । म स्वस्थ छु, समय तालिका अनुसार खाना खाएर आराम गरेर बसेको छु । बरु आइसोलेसनको यो हलमा संक्रमितहरुको बीचमा दुरी कायम नहुँदा केही समस्या होला कि भन्ने डर लाग्छ । कसैले फोन गरेर ‘तिमीलाई कोरोना देखियो रे नि’ भन्दा साँच्चै होकि जस्तो लाग्छ । एउटै शौचालय प्रयोग गर्दा र आइसोलेसनमा संक्रमितहरु आउनेजाने भइरहँदा उनीहरुबाट समस्या होला कि जस्तो लाग्छ । यसरी लक्षण नै नदेखिएको व्यक्तिलाई अरु संक्रमितहरुकै साथमा राखिदिँदा र मनमा अनेक कुरा खेल्दा अब चाहिँ लक्षण देखिएला कि जस्तो लागेको छ । यतिकै मापदण्डमा घरमा बस्ने हो भने घरघरबाटै कोरोना ठीक पार्न सकिन्छ भन्ने लागिरहेको छ । 
(कुराकानीमा आधारित)