थाहाको जगरघारी जंगलमा एक अज्ञात पुरुष मृत अवस्थामा फेला

थाहा, मकवानपुर —
मकवानपुर जिल्लाको थाहा नगरपालिका–४ जुरेथुमस्थित जगरघारी जंगलमा एक पुरुषको शव मृत अवस्थामा फेला परेको छ।
स्थानीय बासिन्दाले असार २६ गते दिउँसो करिब १:१५ बजेतिर जंगलमा शव देखेपछि सिमभन्ज्याङ प्रहरी चौकीलाई खबर गरेका थिए। सूचना प्राप्त भएलगत्तै प्रहरी चौकी सिमभन्ज्याङबाट प्रहरी टोली घटनास्थलमा खटिएको थियो भने थप अनुसन्धान तथा कानुनी प्रकृयाका लागि इलाका प्रहरी कार्यालय पालुङबाट प्रहरी निरीक्षक सबिन बाबु अर्यालको नेतृत्वमा टोली परिचालन गरिएको थियो।
प्रहरीका अनुसार मृतकको नाम, थर र वतन खुल्न सकेको छैन। शव पूर्ण रूपमा सडेको र गलेको अवस्थामा रहेको र मृतक जंगलमा उत्तानो अवस्थामा फेला परेको थियो। घटनास्थल नजिकै करिब ५–७ मिटर दूरीमा निलो ट्राउजर, कालो अण्डरवेयर र सेतो धर्का भएको सर्ट फेला परेको छ। त्यसैगरी घटनास्थलबाट करिब २००–३०० मिटर टाढा एक जोर चप्पल पनि भेटिएको प्रहरीले जनाएको छ।
शवको पहिचान खुल्न नसकेकाले अनुसन्धान जारी रहेको र आवश्यक कानुनी प्रकृयासहित मुचुल्का तयार पार्ने कार्य भइरहेको प्रहरी स्रोतले जनाएको छ।
अहिलेसम्म मृत्युको कारणबारे यकिन खुल्न सकेको छैन भने शव पोष्टमार्टमका लागि सम्बन्धित निकायमा पठाउने तयारी भइरहेको ईलाका प्रहरी कार्यालय पालुङले जनाएको छ।