थाहाका सबैको रिपोर्ट नेगेटिभ, क्वारेन्टाइन खाली

पछिल्लो पटक थाहा नगरपालिकाबाट नमूना संकलन गरी पठाइएका सबैको पिसिआर रिपोर्ट नेगेटिभ आएको छ । झण्डै एक साता अघिदेखि पठाइएको नमुनाको पिसिआर रिपोर्ट नआउँदा अन्यौलता छाइरहेको बेला पछिल्लो पटक ५४ जनाको रिपोर्ट नेगेटिभ आएपछि स्वाब परीक्षणका लागि पठाएका व्यक्तिहरु ढुक्क भएका छन् । उनीहरुको सम्पर्कमा रहेका व्यक्तिहरु पनि ढुक्क भएका छन् ।

हेटौंडास्थित प्रयोगशालामा गरिएको परीक्षणमा थाहा नगरबाट नमुना पठाइएकोमध्ये आज बिहीबार २८ जनाको रिपोर्ट आएको छ । त्यसैगरी हिजो बुधबार २२ जनाको र अस्ती मंगलबार ४ जनाको रिपोर्ट आएको थियो । 

थाहानगरको क्वारेन्टाइनबाट नमुना संकलन गरिएको एक जना भारतीय नागरिकमा कोरोना भेटिएपछि उहाँको सम्पर्कमा रहेका व्यक्तिहरुको स्वाब संकलन गरेर पठाइएको थियो । लगत्तै हेटौंडामा रहेको ग्लोबल आइएमई बैंकका शाखा प्रमुखमा कोरोना संक्रमण भेटिएको पछि उहाँको सम्पर्कमा रहेका थाहानगरका व्यक्तिहरुको पनि स्वाब संकलन गरेर पठाइएको थियो । यसबाहेक थाहा नगरमा भेटिएका अन्य दुईजनाको सम्पर्कमा आएका र थाहानगर बाहिरबाट आएका व्यक्तिहरुको पनि स्वाब संकलन गरेर पठाइएको थियो । यसरी पठाइएका सबैमा कोरोना भाइरसको संक्रमण नरहेको परीक्षणले देखाएको थाहा नगरपालिकाका स्वास्थ्य शाखाका प्रमुख मेघराज बलामीले बताउनु भयो । 

थाहा नगरपालिकाले हिजो बुधबार पठाएको १४ जनाको रिपोर्ट भने आउन बाँकी छ । समुदायस्तरमा कोरोना परीक्षण गर्ने नगरपालिकाको योजना अनुसार हिजो ओखरबजार क्षेत्रबाट स्वाब संकलन गरिएको थियो । 

आज थाहा नगरपालिकाबाट स्वाब पठाइएको छैन । यसअघि स्वाब संकलन गरिएका सबैको परीक्षण रिपोर्ट नेगेटिभ आएपछि सबैलाई नगर क्वारेन्टाइनबाट बिदाइ गरिएको छ । आज बज्रवाराहीस्थित क्वारेन्टाइन खाली रहेको स्वास्थ्य शाखा प्रमुख बलामीले बताउनुभयो ।