थाहाका कोरोना संक्रमितको काठमाडौंको वीर अस्पतालमा उपचार गर्न  फोकल पर्सन ढकालद्धारा पहल

थाहा नगरपालिकामा रहेका कोरोना संक्रमितहरुको काठमाडौंमा उपचार  गर्ने व्यवस्था मिलाइने भएको छ ।
संक्रमितको काठमाण्डौं स्थित  कोभिड १९ यूनिफाइड केन्द्रिय अस्पताल (वीर अस्पताल)मा उपचार गरिने भएको हो ।
शुक्रबार थाहा नगरपालिकाका कोरोना संक्रमितको काठमाण्डौंमा उपचारको लागि फोकलपर्सन विष्णुहरी ढकालले केन्द्रिय अस्पतालका प्रमुख प्रशासकीय अधिकारी प्रा. डा. जागेश्वर गौतमसँग भेटगरि नगरको कोरोना संक्रमित उपचारको व्यवस्था मिलाइदिन आग्रह गर्नुभएको छ । ढकालले थाहा नगरमा संक्रमण बढ्दै जाँदा स्थानिय स्रोत र साधनले धान्न नसक्ने स्थिति आएकाले नगरका संक्रमितलाई काठमाडौंमा उपचारको व्यवस्था गरिदिन प्रा.डा.गौतमलाई आग्रह गर्नुभयो ।

प्रा.डा.गौतमले काठमाडौं ल्याइएका थाहाका संक्रमितलाई सकेसम्म वीर अस्पताल तथा बेड खाली नभएको अवस्थामा उपत्यकाका अन्य अस्पतालहरुमा समन्वय गरी उपचारको व्यवस्था मिलाउने वचन दिनुभयो ।
भेटमा ढकालले कोरोनाबाट नगर दिनानुदिन प्रभावित हुँदै गएकाले जनशक्तिका साथै मेडिकल सामग्रीको पनि अभाव रहेको जानकारी गराउँदै आवश्यक मेडिकल सामग्री उपलव्ध गराइदिन पनि अनुरोध गर्नुभयो । जवाफमा प्रा.डा गौतमले बिरामीको सहज उपचार व्यवस्थापनकै लागि आफु केन्द्रिय अस्पतालमा लागिपरेको जानकारी दिंदै मेडिकल सामग्री उपलव्ध गराउन पनि पहल गर्ने प्रतिवद्धता जनाउनुभयो ।

हाल थाहा नगरमा ५ बेडको कोरोना अस्पताल, २० बेड क्षमताको आइसोलेशन, मेडिकल अधिकृत २ जनासहित केही स्वास्थ्यकर्मी रहेका छन् भने अक्सिजनका लागि ५ वटा अक्सिजन कन्सन्ट्रेटर, साना ठूला गरी ३० वटा अक्सिजन सिलिण्डर, ६ वटा एम्बुलेन्स तयारी अवस्थामा छ ।