थाक्रे–७को ढुङ्गा खानीमा मृत्यु प्रकरणले त्रिभुवन राजमार्ग अवरुद्ध,आशिका तामाङ पनि पुगिन

धादिङ,९ जेठ – धादिङको थाक्रे गाउँपालिका वडा नं. ७ स्थित बज्रकाली रोडा ढुङ्गा उद्योगमा त्रासमय घटना भएको छ। ट्रिपर चालक देविन्द्र खत्रीको ढुङ्गा खस्दा ट्रिपरभित्र चेपिएर मृत्यु भएपछि स्थानीय बासिन्दा आक्रोशित बनेका छन्।
बिहानैदेखि घटनास्थलमा ठूलो भीड जम्मा भएको छ भने उद्योग सञ्चालक सम्पर्कविहीन रहेको आरोप स्थानीयले लगाएका छन्। घटनास्थलमा सङ्घीय सांसद आशिका तामाङ पनि उपस्थित भएकी छिन्। प्रत्यक्षदर्शीका अनुसार, घटनाको विषयमा थाक्रे गाउँपालिका अध्यक्ष रामकुमार आचार्य र सांसद तामाङबीच भनाभन समेत भएको छ।
स्थानीयले खानी सञ्चालनमा चरम लापरवाही भएको आरोप लगाउँदै दोषीमाथि तत्काल कारबाही, मृतक परिवारलाई क्षतिपूर्ति र उद्योग बन्द गर्न माग गरेका छन्। तनाव बढ्दै गएपछि स्थानीयहरूले त्रिभुवन राजमार्ग पूर्ण रूपमा अवरुद्ध गरेका छन्। सडक अवरुद्ध हुँदा सवारी आवागमन ठप्प भएको छ र यात्रुहरू बीच बाटोमै अलपत्र परेका छन्।
प्रहरी घटनास्थलमा खटिए पनि आक्रोशित भीड नियन्त्रण गर्न कठिन भएको बताइएको छ। 

जेठ ८ गते धादिङको थाक्रेमा ढुङ्गा लोड गर्न लागेको बा५ख ८५८० नम्बरको टिपरलाई खानीबाट खसेको ढुङ्गाले च्याप्दा ३५ वर्षीय चालक देवेन्द्र खत्रीको मृत्यु भएको थियो । थाँक्रे गाउँपालिका-७ राम्चेस्थित बज्रकाली रोडा ढुङ्गा उद्योग खानीमा ढुङ्गा लोड गर्न गएको टिफरमा ढुङ्गा खस्दा चालक खत्रीको मृत्यु भएको धादिङ प्रहरीले बताएको छ।