झोलामा साबुन राखेर हिँड्न नगरप्रमुखकाे आग्रह

थाहा नगरपालिकाका प्रमुख लवशेर विष्टले कोरोना भाइरससँगको लडाईंमा जीत हासिल गर्न घरबाट निस्किनु पर्दा झोलामा सावुन राखेर मात्र हिँड्न आग्रह गर्नु भएको छ । ‘सकेसम्म घरमै रहनुस्, अत्यावश्यक काम परेर निस्किनु परेमा झोलामा साबुन राखेर मात्र निस्किनुस्’ उहाँले आग्रह गर्नुभयो ।

दामन एफ. एम.बाट प्रशारण हुने सवालजवाफमा बाेल्दै आज विहान उहाँले  यस्तो आग्रह गर्नुभएको हो ।

मकवानपुरमा हिजो(आइतबार) मात्र २३ जनामा कोरोना भाइरस संक्रमण पुष्टि भएको र जिल्ला कमाण्ड पोष्टले हेटौंडा उपमहानगरपालिका र मनहरी बजार क्षेत्रमा निषेधाज्ञा जारी गर्ने निर्णय गरिरहँदा थाहा नगरका प्रमुख विष्टले यस्तो अपिल गर्नुभएको हो ।

‘हामी काठमाण्डौंबाट अत्यन्त नजिक छौं, तराईबाट काठमाण्डौं जोड्ने भरपर्दो राजमार्ग त्रिभुवन राजपथ पनि यहीँबाट जान्छ, त्यसैले हामी कोरोना संक्रमणको जोखिमबाट बच्न संवेदनशील हुनु आवश्यक छ,’ नगर प्रमुखले भन्नुभयो, ‘गाउँमा कतै नयाँ व्यक्ति आएको पाइएमा तुरुन्त नगरपालिकाको कोरोना रोकथाम सचिबालयमा जानकारी दिनुहोस् ।’

घरबाहिर निस्किँदा स्वयम् सजग रहनु पर्ने, बेलाबेला सेनिटाइजर प्रयोग गर्नु पर्ने, मास्क अनिबार्यरुपमा उचित रुपले लगाउनु पर्नेमा नगर प्रमुखको जोड रहेको छ । सबैठाउँमा सेनिटाइजर उपलब्ध नहुने र बेलाबेला मिचीमिची सावुन पानीले हात धुँदा कोरोना संक्रमणको सम्भावना कम हुने भएकोले साबुन आफैसँगै राखेर हिँड्न आग्रह गरिएको उहाँले बताउनुभयो ।

‘बेलाबेला हात धोइरहनुस्, हात धुन पानी किन्नु पर्दैन, सर्वसुलभ छ’ उहाँले भन्नुभयो ।

थाहा नगरको बजार क्षेत्रमा विभिन्न संघसंस्थाले ठाउँठाउँमा हात धुने स्थानसमेत निर्माण गरेका छन् ।