स्थानीय तहले आफुलाई राजा ठाने : मुख्यमन्त्री पौडेल

प्रदेश नम्बर–३ को प्रदेश समन्वय परिषद्को दोस्रो बैठकलाई सम्बोधन गर्दै मुख्यमन्त्री पौडेलले स्थानीय तहका सरकारले आफु त्यहाँको राजा हुँ भन्ने व्यवहार त्याग्न आग्रह गर्नुभएको छ ।
संविधानले स्थानीय सरकारलाई स्वायत्त अधिकार दिएको भन्दैमा अरुको कुरा मान्नै नहुने व्याख्या गलत भएको बताउँदै उहाँले स्थानीय तहले सहअस्तित्व र सहकार्य आत्मसाथ गर्न आग्रह गर्नुभयो । ‘संविधानले हाम्रा अधिकारको सूची स्पस्ट तयार गरेता पनि किन हामी अझै अन्योलग्रस्त छौं ?’ मुख्यमन्त्री पौडेलले भन्नुभयो ।

एक अर्कालाई स्वीकार नगर्ने हो भने सरकार सफल नहुनेतर्फ सचेत गराउनुभयो । स्थानीय सरकारले प्रदेश तहबाट गएका योजना कार्यान्वयन गर्न नदिएको गुनासो आएको त्यस्तो व्यवहार त्याग्ना उहाँ आग्रह गर्नुभयो ।

‘संविधानले स्वायत्तता अधिकार दिएको भन्दैमा एक अर्कालाई मान्नै पर्दैन भन्ने त हैन नि ?’ उहाँले प्रश्न गर्नुभयो, ‘स्थानीय तहले कानुन बनाउँछ तर प्रदेश सरकारलाई थाहा हुँदैन, स्थानीय तहले प्रदेश सरकारलाई केहि आर्थिक बुझाउनुपर्छ भन्ने छ तर स्थानीय सरकारलाई वास्ता छैन, यसरी कसरी विकास हुन्छ, कसरी सरकारबीच सहकार्य हुन्छ ?’ सम्बोधनका क्रममा मुख्यमन्त्री पौडेलले स्थानीय तहलाई कुनै पनि हालतमा कमजोर बनाउन नदिन आफू प्रतिवद्ध रहेको बताउनुभयो ।
दुईदिन सम्म चल्ने बैठकमा संघियताको सवलीकरणका लागि स्थानीय तह र प्रदेशबीच नीतिगत तथा कार्यगत सम्बन्ध र रणनीतिगत साझेदारीका बिषयमा प्रस्तुतिकरण, बालविवाह मुक्त प्रदेश घोषणा अभियान, प्रदेश तहले स्थानीय तहको लागि बनाउनुपर्ने कानुनको पालनाका बारेमा सुझाव सहित कार्यक्रम रहेको मुख्यमन्त्री तथा मन्त्री परिषद्को कार्यालयले जनाएको छ । बैठकमा प्रदेशका १ सय १९ वटै स्थानीय तहका प्रमुख र उपप्रमुखको सहभागिता छ । साभार जनता