सरस्वती माविमा २६ वर्ष ३ महिना सेवा गरेका शिक्षक बिनोद अर्यालको भव्य बिदाई

थाहा नगरपालिका–७ देउखेल, मकवानपुरस्थित श्री सरस्वती माध्यमिक विद्यालयमा लामो समय सेवा गरेका शिक्षक बिनोद अर्यालको सम्मानसहित बिदाई गरिएको छ। विद्यालय व्यवस्थापन समितिको आयोजनामा मिति २०८२ साल पुस ४ गते “फेरि भेटौँला” कार्यक्रमका बीच उहाँलाई भव्य रूपमा बिदाई गरिएको हो।
धादिङ जिल्ला थाक्रे गाउँपालिका–४ स्थायी घर भई शिक्षक अर्यालले वि.सं. २०५६ साल भदौ १ गतेदेखि २०८२ साल मंसिर १६ गतेसम्म सरस्वती माध्यमिक विद्यालयमा निरन्तर २६ वर्ष ३ महिना सेवा गर्नुभएको थियो। उहाँले २०५६ सालदेखि २०८० सालसम्म सहायक प्रधानाध्यापकको रूपमा र २०८० सालदेखि २०८१ साल भदौसम्म प्रधानाध्यापकको जिम्मेवारी सम्हाल्दै विद्यालयको शैक्षिक तथा प्रशासनिक विकासमा महत्वपूर्ण योगदान पुर्‍याउनुभएको विद्यालयले जनाएको छ।
बिदाई कार्यक्रममा विद्यालय व्यवस्थापन समितिका अध्यक्ष मानबहादुर लोको अध्यक्षता रहेको थियो भने थाहा नगरपालिकाका शिक्षा शाखा प्रमुख माधव विक्रम मल्ल प्रमुख अतिथिका रूपमा उपस्थित रहनुभएको थियो। कार्यक्रममा वडा नं. ७ का वडा अध्यक्ष शिवराज थिङ, श्री सुन्दरीदेवी माध्यमिक विद्यालयका निवर्तमान अध्यक्ष विनायक गोले, शुन्दरीदेवी माध्यमिक विद्यालयका प्रधानाध्यापक तथा थाहा नगर शिक्षा समिति सदस्य हरिकृष्ण कार्की, इन्द्रायणी माध्यमिक विद्यालयका प्रधानाध्यापक नारायणबहादुर कार्की, पूर्व विद्यार्थी रामकृष्ण कार्की (सकार) तथा सरस्वती माविका प्रधानाध्यापक विष्णु वाइवाका साथै शिक्षक, विद्यार्थी र अभिभावकहरूको उल्लेखनीय उपस्थिति रहेको थियो।
कार्यक्रममा वक्ताहरूले शिक्षक अर्यालको अनुशासन, नेतृत्व क्षमता, शैक्षिक सुधारप्रतिको प्रतिबद्धता र विद्यार्थीप्रतिको समर्पणको प्रशंसा गर्दै उहाँको योगदान विद्यालयको इतिहासमा स्मरणीय रहने बताए।
शिक्षक बिनोद अर्याल हाल धुनीबेसी नगरपालिका–९, धादिङस्थित सेतीदेवी आधारभूत विद्यालयमा सरुवा भई सेवा निरन्तरता दिनुहुने भएको छ। बिदाई कार्यक्रमले उहाँप्रति विद्यालय परिवारको सम्मान, कृतज्ञता र शुभेच्छा व्यक्त गरेको बिध्यालयले जनाएको छ।