बृत्ति मार्गनिर्देशन सम्बन्धी प्रशिक्षक प्रशिक्षण तालिम सम्पन्न

थाहा नगरपालिका अन्तर्गत शिक्षा, युवा तथा खेलकुद शाखाको आयोजनामा बृत्ति मार्गनिर्देशन सम्बन्धी प्रशिक्षक प्रशिक्षण (ToT) तालिम सम्पन्न भएको छ। २०८२ साल पौष २७ गते पाइनस होटलमा सम्पन्न तालिम नगर उपप्रमुख भरत गोपालीज्यूको प्रमुख आतिथ्यता तथा शिक्षा, युवा तथा खेलकुद शाखा प्रमुख माधवविक्रम मल्लज्यूको सभाध्यक्षतामा सम्पन्न भएको हो।
कार्यक्रममा ENSSURE परियोजना इकाई, बागमती प्रदेश सामाजिक विकास मन्त्रालयका Technical Officer कृष्ण घिमिरे, Being Youth का अध्यक्ष बसन्त कार्की, सचिव प्रविण विष्ट तथा कार्यक्रम व्यवस्थापक मनिषा बस्नेतको विशेष आतिथ्यता रहेको थियो।
पौष २१ गतेदेखि २७ गतेसम्म ७ दिन सञ्चालन गरिएको तालिममा नगरभित्रका १८ वटा माध्यमिक विद्यालयबाट २४ जना शिक्षकहरूको सहभागिता रहेको थियो। तालिमको सहजीकरण बरिष्ठ प्रशिक्षक राजु के.सी. र सन्तोष खनालले गर्नुभएको थियो।
तालिममार्फत १८ वटा माध्यमिक विद्यालयका कक्षा ९ मा अध्ययनरत ६१६ जना विद्यार्थी प्रत्यक्ष लाभान्वित हुने अपेक्षा गरिएको छ। तालिमपछि प्रशिक्षित शिक्षकहरूले विद्यालयस्तरमा सुरुमा अभिभावकलाई अभिमुखीकरण गर्ने, त्यसपछि कक्षा ९ मा ६ वटा बृत्ति मार्गनिर्देशन सेसन सञ्चालन गर्ने र समिक्षा गर्ने कार्यक्रम रहेको छ। साथै, हाल कक्षा ९ मा अध्ययनरत विद्यार्थीहरूलाई आगामी वर्ष कक्षा १० मा थप एक सेसन सञ्चालन गरिने जानकारी दिइएको छ।
कार्यक्रमको मुख्य उद्देश्य विद्यार्थीहरूको रुचि, क्षमता र खुबीको आधारमा क्षमता मापन गरी उपयुक्त बृत्ति छनोटमा सहयोग पुर्‍याउनु रहेको आयोजकले बताएका छन्। यस तालिमले विद्यार्थीहरूलाई भविष्यको अध्ययन र पेशा छनोटमा स्पष्ट दिशा दिने विश्वास लिइएको थाहा नगर शिक्षा शाखाका अधिकृत सुर्य बहादुर थिङले जनाए।