प्रदेश सरकारको बजेट प्रचारमुखी, सत्ता पक्षलाई नै हेपियोः राजेन्द्र पाण्डे

बागमती प्रदेशसभा सदस्य तथा नेकपा एमाले बागमती प्रदेश संसदीय बोर्डका सदस्य राजेन्द्र पाण्डेले प्रदेश सरकारले ल्याएको आगामी आर्थिक वर्ष २०७८/०७९ को बजेट प्रचारमुखी रहेको टिप्पणी गरेका छन् ।

रातोपाटीसँग कुराकानी गर्दै उनले बागमती प्रदेश सरकारले प्रचारमूखि नीति तथा कार्यक्रमलाई नै बजेटमा प्राथमिकतामा राखेको बताए ।

कोरोना नियन्त्रण, उपचार र खोपलाई प्राथमिकता दिएर बजेट ल्याउनु पर्ने भएपनि प्रदेश सरकारले जनअपेक्षा अनुसारका कार्यक्रम तथा बजेट ल्याउनबाट चुकेको उनले बताए ।

‘प्रदेश सरकारले कोरोना नियन्त्रण, उपचार र खोपलाई प्राथमिकतामा राखेर नागरिकको हित हुने बजेट ल्याउनु पर्ने हो तर त्यसो हुन सकेन, बजेटमा प्राथमिकतामा पर्नुपर्ने विषय सरकारले छुटाएको छ,’ उनले भने ।

उनले वर्तमान डोरमणि पौडेल नेतृत्वको सरकारले एमालेको माधव नेपाल समूहलाई विपक्षीको रुपमा हेरेको र आफूले दिएका सुझावलाई समेत वेवास्ता गरेर बजेट ल्याएको बताए ।

प्रदेश सरकार निश्चित व्यक्तिहरुसंगको छलफलमा चलिरहेको र सत्तापक्षको माधव नेपाल समूहका सांसदलाई विपक्षीको सोचले हेर्ने गरेकाले आफूहरुसँग छलफल गर्न नचाहेको र बजेट जन अपेक्षा भन्दा फरक आएको उनको धारणा छ ।

उनका अनुसार ‘प्रदेश सरकारले आफ्नै हिसाबमा चलेको छ । हामी सत्तापक्ष हौं तर प्रदेश सरकारले माधव नेपाल समूहका सांसद् (हामी)संग कुनै छलफल गरेको छैन । सत्तापक्षको विपक्षीको रुपमा हेरेकाले हाम्रा सुझाव समावेश नभएको देखिएको छ । त्यसैले बजेटमा जनताको अपेक्षा समावेश भएन ।’

सांसद् पाण्डेले बजेटमा आफ्ना सुझाव नसमेटिनु गलत भएकाले केही दिनमा नै बजेटमाथि छलफल हुने र त्यसमा संशोधनका लागि आग्रहसमेत गर्ने तयारी भइरहेको बताए ।

प्रदेश सरकारले सत्तापक्षलाई नै हेप्ने प्रवृत्ती देखाइरहे आफूहरुले पनि त्यसका बारेमा सोच्न बाध्य हुनु पर्ने र सोही अनुसारको अघि बढ्नु पर्ने अवस्थाको सृजना हुने उनको भनाई छ ।

‘प्रदेश सरकारले सत्तापक्षकै सांसद्को सुझावलाई ग्रहण गर्दिन भन्न मिल्दैन हामीले आफ्नो विचार र धारणा सरकार समक्ष राखेका छौं । सुझाव ग्रहण नगरी वेवास्ता गर्दै नभएपनि हुन्छ भन्ने व्यवहार देखाए त्यही बेला सोचौंला ।’ उनले थपे ।