नेविसंघ मकवानपुरमा विवाद : एउटाले मान्यता पायो, अर्कोले ताला लायो

आगामी चैत्र ५ गते हुने स्वतन्त्र विद्यार्थी युनियन (स्ववियु)को निर्वाचनको विषयमा मकवानपुरको नेपाल विद्यार्थी (नेवि) संघको विवादले समस्या सृजना भएको छ ।

नेपाली कांग्रेसको विद्यार्थी संगठन नेवि संघको जिल्लामा दुइवटा समिति रहेको छ । लामो समयदेखि विवाद गर्दै आएका दुवै समूहले स्ववियु निर्वाचनका लागि संगठन दर्ता गरेपछि फेरि थप विवाद बढेको हो । सागर घिमिरे नेतृत्वको नेवि संघलाई मान्यता दिँदै बुद्ध बराम नेतृत्वको संगठनलाई निर्वाचनमा भाग लिन नपाउने अवस्था सृजना गरिएको भन्दै मकवानपुर बहुमुखी क्याम्पसको निर्वाचन समितिको सचिवालयमा ताला लगाएको छ । संघले स्ववियु निर्वाचनका लागि बराम नेतृत्वको संगठनलाई खारेज गर्दै घिमिरे नेतृत्वको समितिलाई मान्यता दिएको थियो । संगठन दर्ताको क्रममा नेवि संघकै नामबाट घिमिरे नेतृत्वले तेस्रो नम्बरमा र बरामको नेतृत्वले चौथो नम्बरमा संगठन दर्ता गरेको थियो । निर्वाचन समितिले जारी गरेको संगठनको नाममा सागर घिमिरे नेतृत्वको नेवि संघलाई मान्यता दिइएको छ । आफू नेतृत्वको संगठनलाई निर्वाचनको प्रक्रियामा भाग लिन नदिने अवस्था सृजना गरेको भन्दै बराम नेतृत्वको नेवि संघले क्याम्पस प्रशासनलाई ज्ञापनपत्र बुझाएर सचिवालयमा ताला लगाएको हो । फागुन १९ गते संगठन दर्ताको कार्यक्रम रहेको थियो ।

बुधबार स्ववियु निर्वाचन समितिले अध्यक्ष÷सभापति तथा संयोजकको नामसहित ६ वटा संघसंगठनको सूची प्रकाशन गरेको थियो । जसमा अखिल नेपाल राष्ट्रिय स्वतन्त्र विद्यार्थी युनियन (प्रसिद्ध रेग्मी), अखिल नेपाल राष्ट्रिय स्वतन्त्र विद्यार्थी यूनियन (दिपेश कार्की), नेपाल विद्यार्थी संघ (सागर घिमिरे), अखिल (क्रान्तिकारी) अभ्युदय खनाल, अखिल (समाजवादी) निर्मला गोले र राष्ट्रिय प्रजातान्त्रिक विद्यार्थी संगठन (समृत खतिवडा) रहेका छन् । आफ्नो नेतृत्वमा भएको संघलाई निर्वाचन प्रक्रियामा सहभागी हुन नपाउने गरी विभिन्न षड्यन्त्र गरी निर्वाचन समितिले संगठनको नाम हटाएकोले आन्दोलित हुनुपरेको नेवि संघका दुइमध्येका एक क्याम्पस अध्यक्ष बरामले बताए । उनले आफू नेतृत्वको संघठनलाई निर्वाचन प्रक्रियामा सहभागी हुन नपाउने वातावरण सृजना गरिए थप आन्दोलन गर्ने चेतावनी समेत दिएका छन् । रेडियो मकवानपुर बाट