नेकपा थाहा नगरपालिकाद्वारा चुनावी अभियानको औपचारिक सुरुवात

नेपाली कम्युनिस्ट पार्टी (नेकपा) थाहा नगरपालिकाले मकवानपुर क्षेत्र नं. २ बाट प्रतिनिधि सभा सदस्यका उम्मेदवार लवशेर बिष्टलाई विजयी गराउने उद्देश्यसहित आफ्नो चुनावी अभियानको औपचारिक सुरुवात गरेको छ।
नेकपा थाहा नगरकमिटीका संयोजक बिनोद कुमार लामाको अध्यक्षतामा जेसीज हलमा सम्पन्न कार्यक्रममा पार्टीका केन्द्रीय, प्रदेश, जिल्ला तथा नगर तहका नेताहरूको उल्लेखनीय उपस्थिति रहेको थियो। कार्यक्रममा नेताहरू प्रल्हाद लामिछाने, माधव तिमिल्सिना, गौतम बुद्ध लामा, रामचन्द्र बल, वीर बहादुर घलान ‘ज्वाला’, निर्वाचन परिचालन समिति मकवानपुर–२ का उपसंयोजक किश्वर बर्तौला, प्रदेश सदस्य, जिल्ला सदस्य, नगरकमिटी तथा वडा कमिटी सदस्यहरू सहभागी थिए।
कार्यक्रमबाट प्रदेश सदस्य इन्द्र श्रेष्ठको संयोजकत्वमा निर्वाचन परिचालन समिति गठन गरिएको छ। साथै थाहा नगरपालिकाका १२ वटै वडामा पार्टी संयोजकहरूको नेतृत्वमा वडा–गत निर्वाचन परिचालन समिति गठन गरिएको जानकारी संयोजक बिनोद कुमार लामाले दिनुभयो। उहाँका अनुसार जनवर्गीय संगठनहरूलाई समेत आ–आफ्नो जिम्मेवारी तोक्दै परिचालन गरिनेछ।
कार्यक्रमलाई सम्बोधन गर्दै प्रतिनिधि सभा सदस्यका उम्मेदवार लवशेर बिष्टले निर्वाचन जिते पनि नजिते पनि मकवानपुर क्षेत्र नं. २ को सर्वाङ्गीण विकासका लागि निरन्तर पहल गरिरहने प्रतिबद्धता व्यक्त गर्नुभयो। उहाँले जनताको आवश्यकता र समावेशी विकासलाई केन्द्रमा राखेर राजनीति गर्ने धारणा राख्नुभयो।
कार्यक्रमले नेकपाको चुनावी अभियानलाई थप व्यवस्थित र सशक्त बनाउने विश्वास व्यक्त गर्दै उपस्थित नेता तथा कार्यकर्ताहरूले एकताबद्ध भएर चुनावी मैदानमा होमिने प्रतिबद्धता जनाएका छन्।