नेकपाको दुबै पक्षलाई निर्वाचन आयोगको पत्र

दुग गुठमा विभाजन भएको नेपाल कम्युनिष्ट पार्टी (नेकपा) लाई निर्वाच्न आयोगले शुक्रबार पत्राचार गरेको छ । आयोगले नेकपाका दुई पक्षले गरेको पत्रका विषयमा थप स्पष्ट पार्न पत्राचार गरेको हो । 

आयोगले केपी शर्मा ओली र पुष्पकमल दाहाललाई अध्यक्ष सम्बोधन गर्दै अलग–अलग प्रकृतिको पत्र पठाएको पाइएको छ । दाहाल–माधवकुमार नेपाल पक्षलाई आधिकारिकताको मागदाबी गर्नका लागि कानुनी प्रक्रिया पूरा गरेर निवेदन दिन भनिएको छ भने ओली पक्षलाई आयोगले विवरण अद्यावधिकका लागि बुझाइएको पत्रमा स्पष्ट पार्न भनेको छ ।

दुवै पक्षलाई पत्र पठाइएको तर त्यसमा लेखिएको विषयबारे आफूलाई जानकारी नभएको आयोगका प्रवक्ता सहसचिव राजकुमार श्रेष्ठ बताउँछन् । गत पुस ५ गते प्रधानमन्त्री केपीशर्मा ओलीले प्रतिनिधि सभा विघटन गरेको विरोधमा दुई पक्षले लगातार निर्वाचन आयोगमा पत्राचार गर्दै आएका छन् ।  

दाहाल र नेपाल पक्षका नेताहरूले पुस १० मा आयोग पुगेर नेकपाको आधिकारिकतामाथि दाबी गरेका थिए । दाहालले केन्द्रीय कमिटीको दुई तिहाइ बढी बहुमत आफूहरूसँग रहेको उल्लेख गर्दै आधिकारिकताको विवाद छिटो टुंग्याउन आयोग पदाधिकारीलाई आग्रह गर्दै आएका छन् । दाहालले आयोगमा र सार्वजनिक रूपमै ४ सय ४१ सदस्यीय केन्द्रीय कमिटीमा ३ सय १५ सदस्यको साथ आफूहरूसँग रहेको दाबी गरेका छन् । 

आयोगले ओली पक्षलाई भने विभिन्न विषयमा अद्यावधिक गर्न गरिएको पत्रका विषयमा थप स्पष्ट पार्न भन्दै पत्राचार गरेको छ ।