थाहा नगरपालिकामा नेपाल कम्युनिष्ट पार्टी नेकपा एकताले औपचारिकता पायो
नगर कमिटीका  ७९ सदस्यहरुद्वारा सपथ ग्रहण

 
 मकवानपुर, थाहा नगरपालिकामा नेपाल कम्युनिष्ट पार्टी नेकपा एकताले औपचारिकता पाएको छ । आइतबार नेकपा थाहा नगरकमिटी सदस्यहरुले सपथ लिएसँगै नगरमा पार्टी एकताले औपचारिकता पाएको हो । 
नेकपा थाहा नगर कमिटी अध्यक्ष अरुण रायमाझीको सभाध्यक्षता तथा नेकपा केन्द्रीय सदस्य केदार न्यौपानेको प्रमुख आतिथ्यमा सपथ ग्रहण कार्यक्रम भएको हो । कार्यक्रममा थाहा नगर कमिटीका ८१ जनामध्ये अध्यक्ष र सचिब बाहेक ७९ जना सदस्यहरुलाई प्रमुख अतिथि न्यौपानेले पद तथा गोपनियताको सपथ ग्रहण गराउनु भएको हो । 
अध्यक्ष र सचिबले भने यसअघि जिल्ला पार्टी कार्यालयमा सपथ ग्रहण गरिसक्नु भएको छ । थाहा नगरपालिकाको शिखरकोटमा आयोजित नगर कमिटी सदस्यहरुको सपथ ग्रहण कार्यक्रममा बोल्दै प्रमुख अतिथि न्यौपानेले कार्यकर्ताहरुलाई नियमितरुपमा जनतासँग जोडिन र बलियो कम्युनिष्ट पार्टी निर्माणमा लाग्न आग्रह गर्नुभयो । 
कार्यक्रममा नकेपा केन्द्रीय सदस्यहरु विरोध खतिवडा, कुमारी मोक्तान, रामेश्वर राना, जिल्ला अध्यक्ष मुनु सिग्देल, प्रदेश कमिटी सदस्य विष्णु विष्ट आदर्श, जिल्ला सचिबालय सदस्य लवशेर विष्ट जिल्ला कार्यालय सदस्य बलराम बल लगायतले बोल्नु भएको थियो ।