थाहामा संविधान दिवस २०७५को अवसरमा द्विप प्रज्जवलन गरिने
देशैभर विविध कार्यक्रम सहित मनाइदै

—    शम्भु अधिकारी, थाहा नगरपालिका
०३ असोज, २०७५

आज संविधान दिवसको अवसरमा थाहा नगरपालिका थाना बजार स्थित बुद्घचोकमा द्विप प्रज्जवलन गरि मनाइने भएको छ ।
     थाहा नगरपालिकाको सहयोगमा लायन्स क्लव पिस थाहा र लियो क्लव अफ पिस थाहाको आयोजनामा द्विप प्रज्जवलन गरिन लागेको हो । कार्यक्रममा वडा कार्यालय, सरकारी कार्यालयहरु, बजार ब्यवस्थापन समिति, विभिन्न संघ÷संस्था, नेपाल प्रहरी लगायतको सहभागिता रहने वताइएको छ ।
प्रदेश ३ को राजधानीमा संविधान दिवस मनाइयो
     ३ नम्बर प्रदेश सरकारले प्रदेश राजधानी हेटौंडामा भव्यरुपमा संविधान दिवस मनाएको छ । विहान भुटनदेवी विद्यालयबाट प्रभातफेरी सहित मकवानपुर बहुमुखी क्याम्पसमा पुगेर सभामा परिणत भएको थियो । प्रभातफेरीमा विभिन्न वडा कार्यालय, सरकारी कार्यालयहरु, टोलविकास संस्थाहरु, विभिन्न विद्यालयहरु, खेलकुद संघहरु, विभिन्न समुदायका झाँकीहरु, नेपाल प्रहरी, सशस्त्र प्रहरी, नेपाल स्काउट लगायत विभिन्न संघसंस्थाको सहभागि रहेको थियो ।
     प्रदेश ३ का मुख्यमन्त्री डोरमणी पौडेलको अध्यक्षतामा भएको कार्यक्रममा प्रदेश ३ का आन्तरिक मामिला तथा कानुन मन्त्री शालिकराम जम्कट्टेलले स्वागत मन्तव्य राख्नु भएको थियो ।
कार्यक्रममा प्रदेश ३ का सभामुख, उप सभामुख, मन्त्रीहरु, प्रदेश सांसदहरु, हेटौंडा उपमहानगरका मेयर, प्रदेश प्रमुख सचिव, कानुन सचिव, सुरक्षा निकायका प्रमुखहरु लगायतकाको सहभागिता रहेको थियो । कार्यक्रममा जनआन्दोलनका शहिद बासुदेव घिमिरे र जनयुद्घका सहिद पत्रकार रुद्र पाख्रिनको परिवारलाई मुख्यमन्त्रीले ओसल्ला ओढाएर अभिनन्दन गर्नु भएको थियो ।
संविधान दिवसको उपलक्ष्यमा राष्ट्रपतिको अपिल

      राष्ट्रपति विद्यादेवी भण्डारीले संविधानले सामाजिक न्यायमा आधारित समतामूलक समाजको परिकल्पना गर्दै समाजवादउन्मुख अर्थतन्त्र निर्माण गर्ने लक्ष्य लिएको बताउनु भएको छ ।
     सामाजिक आर्थिक विकासलाई गति प्रदान गर्ने संविधानको महत्वपूर्ण भावनालाई गहिरोसँग आत्मसात् गर्न उनले जनप्रतिनिधिमूलक संस्था, राजनीतिक दल, राज्यका सबै अङ्ग र आम नागरिकलाई अपिलसमेत गर्नु भएको छ । ‘सामाजिक आर्थिक विकासलाई गति प्रदान गर्ने संविधानको महत्वपूर्ण भावनालाई गहिरोसँग आत्मसात् गर्दै सबै जनप्रतिनिधिमूलक संस्था, राजनीतिक दल, राज्यका सबै अङ्ग र आम नागरिक क्रियाशील हुनु सामयिक आवश्यकता हो भन्ने मलाई लागेको छ’, संविधान दिवसका अवसरमा राष्ट्रपतिद्वारा जारी विज्ञप्तिमा भनिएको छ । राष्ट्रपति विद्यादेवी भण्डारीले मुलुकमा लोकतान्त्रिक राजनीतिक प्रणालीलाई समृद्ध तुल्याउन संवैधानिक मार्ग्चित्रले मूर्तरूप लिने वातावरण बन्नु सबैका लागि खुशीको विषय भएकोसमेत बताउनु भयो । संविधान जारी भएको आजको दिनले सबैलाई संवैधानिक मूल्य एवं मान्यताहरू कार्यान्वयन गर्न प्रेरणासहित अठोट जागृत गर्न सफलता प्राप्त हुने अपेक्षासमेत राष्ट्रपति भण्डारीले आफ्नो सन्देशमा व्यक्त गर्नु भएको छ । राष्ट्रपति भण्डारीले संविधान दिवसका अवसरमा सुख, शान्ति, प्रगति र समृद्धिका साथै देशमा राष्ट्रिय एकता, अखण्डता, आपसी सद्भाव र सहकार्य कायम हुन सकोस् भन्ने शुभकामना व्यक्त गर्नु भएको छ ।