थाहाका १ सय ४८ विद्यार्थी कक्षा ११ मा पढ्न योग्य !

मकवानपुर थाहा नगरपालिकाका विद्यालयहरुको एसइई परीक्षामा २७.६६ प्रतिशत परीक्षार्थी उतीर्ण भएका छन् । २०८० को एसइई परीक्षामा थाहा नगरपालिकाका विभिन्न १७ विद्यालयबाट ५ सय ११ परीक्षार्थीले परीक्षा दिएकोमा १ सय ४८ परीक्षार्थी मात्र उतीर्ण भएका छन् ।

नतिजा अनुसार सबैभन्दा बढि पालुङ इङ्लिस आवासिय विद्यालयबाट ८१.८२ प्रतिशत विद्यार्थी उतीर्ण भएका छन् । दोस्रोमा सरस्वती विद्या मन्दिर बज्रवाराहीबाटे ७० प्रतिशत विद्यार्थी उतीर्ण भएका छन् । सामुदायिकतर्फ सबैभन्दा बढि नाट्यश्वर माविबाट ४५.४५ प्रतिशत विद्यार्थी उतीर्ण भएका छन् । नगरमै सबैभन्दा कम विद्यार्थी उतीर्ण मत्स्यनारायण माविको भएको छ । मत्स्यनारायणबाट ८.३३ प्रतिशत परीक्षार्थी उतीर्ण भएकाछन् ।

नगरमै सबैभन्दा बढि ७७ जना विद्यार्थी एसइई परीक्षामा सहभागी गराउने जनकल्याण माविबाट ९  जना उतीर्ण भएका छन् । सबैभन्दा कम पालुङ मोडर्न इङ्लिस स्कूलले ५ जना सहभागी गराएकोमा २ जना उतीर्ण भएका छन् ।

गत चैत १५ गते सुरु भएर चैत २७ गते एसईई सकिएको थियो ।

 २ वटा विषयसम्म एनजी हुने विद्यार्थीले ग्रेड वृद्धिका लागि मौका परीक्षा दिन पाउनेछन् । राष्ट्रिय परीक्षा बोर्डले आगामी साउन १८ र १९ गते ग्रेडवृद्धि परीक्षाको तालिका समेत सार्वजनिक गरेको छ ।