जनकल्याण माध्यमिक विद्यालयका १३ विद्यार्थीलाई ‘झलकचन्द्र शिक्षा ज्योती’ छात्रवृत्ति प्रदान

थाहा नगरपालिका स्थित जनकल्याण माध्यमिक विद्यालयका १३ जना विद्यार्थीलाई ‘झलकचन्द्र शिक्षा ज्योती छात्रवृत्ति’ प्रदान गरिएको छ। विद्यालयमा कक्षा १०, ११ र १२ मा प्राविधिक तथा साधारण संकायमा अध्ययनरत गरिब तथा जेहेन्दार विद्यार्थीलाई उक्त छात्रवृत्ति प्रदान गरिएको हो।
विद्यालयका संस्थापक अध्यक्ष स्वर्गीय झलकचन्द्र बिष्टको स्मृतिमा उनका छोरा सुवासचन्द्र बिष्टले स्थापना गरेको अक्षयकोषबाट प्राप्त ब्याज रकमबाट छात्रवृत्ति वितरण गरिएको विद्यालयले जनाएको छ। बिष्टले आफ्ना बुबाको सम्झनामा ५ लाख रुपैयाँको अक्षयकोष स्थापना गरेका छन्, जसबाट हरेक वर्ष विद्यार्थीलाई छात्रवृत्ति प्रदान गर्दै आइएको छ।
विद्यालय व्यवस्थापन समितिका अध्यक्ष राजिव कुमार स्याङ्तानको अध्यक्षतामा सम्पन्न छात्रवृत्ति वितरण कार्यक्रममा थाहा नगरपालिकाका नगर प्रवक्ता हिरेन्द्र कुमार रायमाझी, झलकचन्द्र शिक्षा ज्योती कोषका अध्यक्ष सुवासचन्द्र बिष्ट, कोषका सचिव बिमलकुमार बिष्ट, जनकल्याण माध्यमिक विद्यालयका निवर्तमान प्रधानाध्यापक सानोभाइ कार्की, प्रधानाध्यापक रामकुमार बल, शिक्षक अभिभावक संघका अध्यक्ष नवराज कार्की, जनकल्याण एल्मुनाइ एसोसिएसनका सदस्य शम्भु अधिकारी लगायतको उपस्थिति रहेको थियो।
कार्यक्रममा बोल्दै कोषका अध्यक्ष सुवासचन्द्र बिष्टले आगामी दिनमा अक्षयकोषको रकम वृद्धि गरी अझ धेरै विद्यार्थीलाई छात्रवृत्तिको दायरामा समेट्ने योजना रहेको बताए।
विद्यालयले छात्रवृत्ति स्थापना गरी विद्यार्थीलाई प्रोत्साहन गरेकोमा बिष्ट परिवारप्रति धन्यवाद व्यक्त गरेको छ।