गणित शिक्षा परिषद् मकवानपुरद्वारा थाहाको झम्केश्वरी मावि सम्मानित

मकवानपुर — शैक्षिक सत्र २०८१ को माध्यमिक शिक्षा परीक्षा (एसईई) मा अनिवार्य गणित तथा अतिरिक्त गणित विषयमा उत्कृष्ट नतिजा हासिल गरेपछि गणित शिक्षा परिषद् मकवानपुरले झम्केश्वरी माध्यमिक विद्यालयलाई सम्मान गरेको छ।
शनिबार हेटौंडामा आयोजित विशेष कार्यक्रममा गणितजस्तो चुनौतीपूर्ण विषयमा उल्लेखनीय सफलता हासिल गरेको भन्दै विद्यालयलाई सम्मान गरिएको हो। सो अवसरमा विद्यालयका गणित शिक्षक छेवाङ दोर्जे लामालाई सम्मानपत्रसहित सम्मान गरिएको परिषद्ले जनाएको छ।
एसईई परीक्षामा झम्केश्वरी माविकी छात्रा आयुषा प्रधानले गणित तथा अतिरिक्त गणित विषयमा ४.०० जीपीए प्राप्त गर्दै नगर प्रथम स्थान हासिल गर्न सफल भएकी थिइन्। उनको यो सफलताले विद्यालयमा वर्षौंदेखि भइरहेको निरन्तर शैक्षिक मेहनत, शिक्षकहरूको समर्पण तथा विद्यार्थीको आत्मविश्वासलाई स्पष्ट रूपमा प्रतिबिम्बित गरेको आयोजकले बताएका छन्।
सम्मान ग्रहणपछि विद्यालयका प्रधानाध्यापक गणेशमान श्रेष्ठले ग्रामीण विद्यालय भए पनि ठूलो सपना बोकेर अघि बढिरहेको उल्लेख गर्दै सीमित स्रोत–साधनका बाबजुद शिक्षक, विद्यार्थी र अभिभावकको विश्वास र मेहनतले गणितजस्तो कठिन विषयमा ४.०० जीपीए सम्भव भएको बताए। उनले यो सफलता विद्यालय मात्र नभई सम्पूर्ण थाहा नगरपालिकाकै गौरव भएको धारणा व्यक्त गरे।
प्रधानाध्यापक श्रेष्ठले आगामी दिनमा गणितसँगै अन्य विषयहरूमा पनि उत्कृष्ट नतिजा ल्याई विद्यालयलाई शैक्षिक उत्कृष्टताको केन्द्रका रूपमा विकास गर्ने लक्ष्य रहेको जानकारी दिए। गणित विषयमा प्राप्त यस उपलब्धिले झम्केश्वरी माविकी छात्रा आयुषा प्रधान थाहा नगरपालिकाभित्रका सामुदायिक तथा संस्थागत विद्यालयहरूमध्ये अग्रस्थान हासिल गर्न सफल भएको स्पष्ट संकेत गरेको बताइएको छ।