केसी काँग्रेस छोडेर पुनः नेकपामा

मकवानपुर,
नेपाली काँग्रेसका मकवानपुर क्षेत्रिय सदस्य बिनोद केसीले पार्टी परित्याग गरेको घोषणा गरेका छन् । २ वर्ष अघि तत्कालीन माओवादी केन्द्र छाडेर नेपाली काँग्रेसको सदस्यता लिएका थाहा नगरपालिका ४ का केसी पुनः नेपाल कम्युनिष्ट पार्टी(नेकपा)मा फर्किएका छन् । 
आज सोमबार एक विज्ञप्ती जारी गर्दै केसीले पुनः नेकपामा जोडिएको उल्लेख गरेका छन् । विज्ञप्तीमा उनले आफू २०५१ सालदेखि विद्यार्थी राजनीतिमार्फत् कम्युनिष्ट आन्दोलनमा जोडिएको र विशेष कारणवश गत संसदीय निर्वाचनताका नेपाली काँग्रेसमा प्रवेश गरेको भए पनि काँग्रेसबाट मुलुकको विकास सम्भव नभएको उल्लेख गरेका छन् ।
नेपाली काँग्रेसले जनताको मन जित्न नसकेको, प्रमुख प्रतिपक्षको भूमिका निर्वाह गर्न नसकेको र सरकारलाई रचनात्मक सुझाव दिनुका सट्टा गाली मात्र गरेर बसेको भन्दै केसीले काँग्रेसका सदस्यहरुलाई नेकपामा आवद्ध हुन आह्वान पनि गरेका छन् । 
संघीय संरचनामा भएको पहिलो स्थानीय तथा संसदीय निर्वाचनमा विजेता हुनुका साथै तत्कालीन नेकपा एमाले र नेकपा माओवादी केन्द्र एक भई नेपाल कम्युनिष्ट पाटी बनेको सन्दर्भमा उक्त पार्टीको सरकारले दिन प्रतिदिन जनमुखी कदमहरु चाल्दै गएको केसीले बताएकाछन् । 
उनले नेकपाले दिन प्रतिदिन जनताको मन जित्दै गएको उल्लेख गरेका छन् । वि.सं. २०५१ सालमा अखिल क्रान्तिकारीको विद्यार्थी राजनीतिबाट राजीनितक जीवन शुरुवात गरेका केसी अनेरास्ववियू क्रान्तिकारीको मकवानपुर जिल्ला सचिब, अखिल नेपाल जनवादी युवा लिगको मकवानपुर जिल्ला उपाध्यक्ष, जनमोर्चा नेपालको जिल्ला सदस्य, योङ कम्युनिष्ट लिगको जिल्ला सदस्य, नेकपा माओवादी केन्द्रको थाहा नगर सदस्य लगायत विभिन्न पदमा रही काम गरिसकेका व्यक्ति हुन ।

हेर्नुस् विज्ञप्तीः