एमबीबीएस प्रवेश परीक्षामा नाम निकाल्न सफल परिक्षित रायमाझीलाई वडा न ३ को नगद सहित सम्मान

थाहा नगरपालिका । आर्थिक वर्ष २०८२/०८२ का शैक्षिक प्रवर्द्धन कार्यक्रम अन्तर्गत वडा न ३ ले थाहा नगरपालिका वडा नं. ३ निवासी परिक्षित रायमाझीलाई सम्मान गरेको छ। एमबीबीएस अध्ययनका लागि लिइएको प्रवेश परीक्षामा नवौँ (९औँ) स्थान हासिल गर्न सफल भएकोमा उनलाई सम्मानपत्रसहित नगद एक लाख रुपैयाँ प्रदान गरिएको हो।
वडाले शिक्षा क्षेत्रमा उत्कृष्ट उपलब्धि हासिल गर्ने विद्यार्थीलाई प्रोत्साहन गर्ने उद्देश्यले उक्त सम्मान प्रदान गरेको वडा अध्यक्ष हिरेन्द्र कुमार रायमाझीले बताए।
अघिल्लो आर्थिक बर्षमा पनि वडाले एमबिबिएस परिक्षामा नाम निकाल्न सफल थाहा ३ कटुवाल डाडा निवासी परिवर्तन स्याङ्तानलाई शैक्षिक प्रवर्द्धन कार्यक्रम अन्तर्गत नगद एक लाख सहित सम्मान गरेको थियो ।


वडा कार्यालयको परिसरमा सम्पन्न कार्यक्रममा थाहा नगरपालिकाका प्रमुख बिष्णु बिष्ट,प्रमुख प्रशासकीय अधिकृत निरज पौडेल,समुदायमा आधारित प्रशामक सेवाका प्रमुख चिनिया लामा,समाजसेवी अरुण रायमाझी,परिक्षित रायमाझीका अभिभावक लगायतका उपस्थिति रहेको थियो।
सम्मान ग्रहण गर्दै परिक्षित रायमाझीले प्राप्त सहयोग र सम्मानले थप मेहनत गर्न प्रेरणा मिलेको बताउँदै वडा न ३ प्रती आभार व्यक्त गरे। थाहा नगरपालिका वडा न ३ का अध्यक्ष हिरेन्द्र कुमार रायमाझीले आगामी दिनमा पनि शैक्षिक उपलब्धि हासिल गर्ने विद्यार्थीलाई निरन्तर प्रोत्साहन गर्ने प्रतिबद्धता जनाएका छन।

रायमाझीले  हिमालयन बोर्डिङ स्कुल शिखरकोट बाट २०७९ सालको एसईई परिक्षामा ३.९ जिपिए सहित थाहा नगर प्रथम भएका थिए।