आर्थिक पुनर्संरचनामार्फत समृद्ध मकवानपुर,२ बनाउने सन्तोष बिस्टको प्रतिबद्धता

हेटौंडा/ प्रतिनिधि सभा निर्वाचनअन्तर्गत मकवानपुर क्षेत्र नं. २ बाट प्रगतिशील लोकतान्त्रिक पार्टीका उम्मेदवार सन्तोष बिस्टले उत्पादनमुखी अर्थतन्त्र र सामाजिक न्यायमा आधारित आर्थिक पुनर्संरचनालाई आफ्नो प्रमुख चुनावी एजेन्डा बनाएका छन्।
‎उम्मेदवार बिस्टले देशको वर्तमान आर्थिक चुनौतीको समाधान उत्पादन वृद्धि,न्यायपूर्ण वितरण र स्थानीय अर्थतन्त्रको सशक्तीकरणबाट सम्भव हुने विश्वास व्यक्त गरेका छन्। उनले प्रगतिशील कर प्रणाली लागू गरी धनी,गरिबबीचको खाडल घटाउने, सामूहिक उत्पादनको प्रवर्द्धनमार्फत गरिबी उन्मूलन गर्ने प्रतिबद्धता जनाएका छन्।
‎उनको चुनावी घोषणापत्रअनुसार स्थानीय स्रोत, सीप र श्रमको अधिकतम प्रयोग गर्दै उत्पादनमुखी स्थानीय अर्थतन्त्र निर्माण गरिनेछ। साथै अनुसन्धान, नवप्रवर्तन र डिजिटल अर्थतन्त्रको विस्तार गरी युवालाई स्वदेशमै रोजगारी सिर्जना गर्ने योजना अघि सारिएको छ।
‎उम्मेदवार बिस्टले वैदेशिक लगानी आकर्षणका लागि पारदर्शी नीति,स्थिर शासन र लगानीमैत्री वातावरण सुनिश्चित गर्ने बताउँदै अनुत्पादक क्षेत्रमा भइरहेको लगानीलाई उत्पादनशील क्षेत्रमा रूपान्तरण गर्ने नीति लिने बताएका छन्।
‎आर्थिक पुनर्संरचना बिना सामाजिक न्याय सम्भव छैन, भन्दै उनले जनताको हातमा सत्ता, जनताको पक्षमा नीति भन्ने मूल मन्त्रका साथ मकवानपुर,२ लाई समृद्धि र आत्मनिर्भरतातर्फ लैजाने दृढ संकल्प व्यक्त गरेका छन्।
‎प्रगतिशील लोकतान्त्रिक पार्टीको चुनाव चिह्न ‘आँखा’ लिएर मैदानमा उत्रिएका उम्मेदवार सन्तोष बिस्टले सुशासन,आर्थिक न्याय र समावेशी विकासलाई व्यवहारमै उतार्ने दाबी गरेका छन्।