" थाहा नगरको सुल्झन नसकेको सिमा विवाद"

हाम्रो देश नेपाल भू-परिवेश्ठित रास्ट्र भएकै कारण चौतर्फी सिमा क्षेत्र बिबादमा जकडिएको छ। उत्तरतर्फ र दक्षिणतर्फ रहेका दुई बिशाल अनि शक्तिसाली रास्ट्रहरु चीन र हिन्दुस्तान द्वारा भैरहेको सिमा अतिक्रमणको विषयलाई  न कुनै नेता नत कुनै सरकारले नै समाधान गर्न सकेको छ। उतरतर्फ भन्दा पनि दक्षिणतर्फ हिन्दुस्तानले गरेको सिमा अतिक्रमण र हेपा प्रवृत्तिलाई सिमा क्षेत्रमा बसोबास गर्ने आम नेपालीहरुले कहिलेसम्म सहनुपर्ने हो,यो अति गम्भीर एजेन्डा वर्षौंदेखि उस्तै रहेकोे छ।

सिङ्गो देशै त सिमा बिबादमा उल्झेको परिस्थितिमा हाम्रो थाहा नगरपालिका चाहिँ यस समस्याबाट बन्चित हुने सम्भावना नै रहेन। प्रसङ्ग  हो-थाहा नगरपालिका वडा नं.४ को सिमभन्ज्याङसित सिमा जोडिएको भिमफेदी गाउँ पालिका वडा नं.९ गोलमोड र तारेभिरको । स्थानीय सरकारहरु गठन  भएसंगै थाहा नगरपालिका र भिमफेदी गाउँ पालिकाले जिम्मेवारि अनि अधिकार पाएका जनप्रतिनिधिहरु त पाए तर सिमा अन्यौलतालाई दुबै पक्षले समाधान गर्नमा खासै चासो भने देखाएनन्। यसै कारण बिबादित सिमा क्षेत्रमा अवस्थित गोलमोड चौर जस्तो खेलकुद र तारेभिर जस्तो साहसिक  पर्यटन बिकासको व्यापक सम्भावना भएको  स्थानहरु ओझेलमा परेका छन् । दामन,सिमभन्ज्याङ, नारायणझ्याउ,ठुलोमाखु,फापरबारी,झिरघारी,अघोर,खर्क,   नलिबन आदि गाउँका खेलकुदप्रेमी युवाहरूको फुटबल खेल्ने रहर पूरा गर्ने एकमात्र उपलब्ध फराकिलो चौर भनेकै गोलमोड चौरू हो। यहाँ फुटबल खेल्न मात्र नभै अन्य बिबिध कार्यक्रमहरुको पनि आयोजना  गर्न सकिन्छ ।

 त्यसैगरी  जमिनको सतहदेखी करिब १,००० मिटर अग्लो रहेको चट्टाने तारेभिरलाई दृश्यावलोकन,हाईकिङ्ग,पारा-ग्लाईडिङ्ग,रक क्लाईम्बिङ्ग जस्ता साहसपूर्ण  एबं  मनोरञ्जनात्मक गतिविधिले भरिपुर्ण पर्यटन आकर्षणको मुख्य केन्द्र नै बनाउन सकिन्छ । सो तारेभिर ऋषेश्वर मन्दिरको ठिक पछाडिको भाग हो। समग्रमा भनुपर्दा तारेभिर पहाड र ऋषेश्वर पहाड एक सिङ्गो पहाड हो। युगौंदेखि यथावत रहेको सिमा अन्यौलतालाई दुबै पालिकाका कार्यकारी प्रमुखहरुको आपसी समन्वय र समझदारीमा दिगो रुपमा समाधान गर्दै दुबै पक्षको सक्रियतामा ती स्थानहरुको यथोचित बिकास,निर्माण अनि प्रचारप्रसार गर्नमा आवश्यक   पहलहरु अघि बढाईनुपर्नेमा स्थानीय बासिन्दाहरुले घनघोर गुनासो गरेका छन् । साथै  गोलमोड संगै सिमा जोडिएको पर्यटकिय आकर्षण  मैत्री बगैचा पार्क भिमफेदी गाउँ पालिका क्षेत्रमा अवस्थित छ र यी तीन बिशेष स्थानहरुलाई बिशेषता अनुसार समायोजन गरि बिकास गर्ने हो भने पर्यटन क्षेत्रमा नयाँ सफलता पाउनेछ।