संक्रमितले सूचना लुकाउँदा थाहामा कोरोनाको जोखिम बढ्यो
एउटै मोटरसाइकलमा काठमाण्डौं–बीरगन्ज–काठमाण्डौं–पालुङ यात्रा गरेका संक्रमितको साथीलाई १० दिनपछि क्वारेन्टाइन पठाइयो

थाहानगरको ओम अध्याय क्वारेन्टाइनमा बसेको अवस्थामा बिहीबार कोरोना संक्रमण पुष्टि भएका ३४ वर्षीय पुरुषले सूचना लुकाउँदा थाहानगरमा कोरोनाको जोखिम बढेको छ । एउटै मोटरसाइकलमा थाहा–२ इन्द्रायणी बस्तीका अर्को एक जना पनि आएकोमा संक्रमित व्यक्तिले आफू संक्रमित भइसकेपछि थाहा नगरपालिकाले कन्ट्याक्ट टे«ेसिङको क्रममा सोधपुछ गर्दा मात्र जानकारी दिनुभएको थियो ।

गत भदौ १७ गते थाहा नगरपालिका–६ स्थित घरमा जानु अघि क्वारेन्टाइनको सम्पर्कमा जानु भएका उहाँले क्वारेन्टाइन व्यवस्थापनलाई आफू कोरोना जोखिम क्षेत्रबाट आएकोले क्वारेन्टाइनमा बस्न आएको र आफू एक्लै आएको जानकारी दिनुभएको थियो । 

नेपाली सेनाको भद्रकाली व्यारेकमा अधिकृतस्तरमा कार्यरत उहाँले बिहीबार साँझ कोरोना संक्रमणको रिपोर्ट पोजिटिभ आएपछि मात्र आफूसँग एउटै मोटरसाइकलमा अर्को व्यक्ति पनि आएको जानकारी दिनु भएपछि अहिले थाहामा कोरोनाको जोखिम बढेको थाहा नगरपालिकाका डाक्टर सुवोध चापागाईंले बताउनु भयो । 

संक्रमितको ट्राभल हिस्ट्री हेर्दा संक्रमित व्यक्ति र थाहा–२ का उहाँका साथी पालुङमात्र सँगै आएको हाइन, उहाँहरु गत भदौ १२ गते बीरगन्ज पनि एउटै मोटरसाइकलमा जानुभएको थियो । त्यसपछि काठमाण्डौं फर्किएका उहाँहरु थाहानगर आउँदा पनि सँगै हुनुहुन्थ्यो । 

दुबैको घर थाहानगर भए पनि एक जनाको बज्रवाराही र अर्कोको पालुङ भएकोले काठमाण्डौंबाट सँगै आएकोमा थाहा–२ का साथीलाई थाहा नगरपालिका–१ स्थित ओखरबजार क्षेत्रमा छोडेर हाल संक्रमित भेटिएका व्यक्ति बज्रवाराही जानुभएको थियो । 

१० दिनदेखि  थाहा–२ स्थित घरगाउँमा बसिरहनुभएका नेपाली सेनामै कार्यरत ३४ वर्षीय पुरुष कोरोना संक्रमितकोे कन्ट्याक्ट ट्रेसिङमा परेपछि उहाँलाई अहिले ओम अध्याय क्वारेन्टाइनमा पठाइएको छ भने उहाँको परिवारलाई होम क्वारेन्टाइनमा बस्न भनिएको डा. चापागाईंले बताउनु भयो ।