शिखर बचत तथा ऋण सहकारी संस्थाले नवौं वार्षिक साधारण सभा सम्पन्न 

मकवानपुरको थाहा नगरपालिकास्थित शिखरकोटमा रहेको शिखर बचत तथा ऋण सहकारी संस्थाले नवौं वार्षिक साधारण सभा बुधबार सम्पन्न गरेको छ । 
थाहा नगरपालिका–३ को सभाहलमा भएको साधारण सभा उद्घाटनको अध्यक्षता संस्थाका अध्यक्ष मधुसूदन विष्टले गरेका थिए भने कार्यक्रममा वडा अध्यक्ष राजेश केसीको प्रमुख आतिथ्यता रहेको थियो । 
उद्घाटन समारोहको अवसरमा प्रमुख अतिथि केसी, प्रदेश नं. ३ सहकारी संघका सञ्चालक विमलकुमार ढकाल, च्वाइस नेपालका मकवानपुर प्रतिनिधि प्रताप घिमिरे, थाहा स्वास्थ्य सहकारीका अध्यक्ष हरिकृष्ण कार्की, फरक सोचका यादव जंग रायामाझी लगायतले शुभकामना मन्तव्य व्यक्त गरेका थिए ।
साधारण सभाले अध्यक्ष मधुसूदन विष्टले प्रस्तुत गरेको संचालक समितिको प्रतिवेदन तथा आगामी वर्षको नीति तथा कार्यक्रम, सचिब सहदेव ढकालले प्रस्तुत गरेको प्रगति प्रतिवेदन र कोषाध्यक्ष मनोज रायमाझीले प्रस्तुत गरेको आर्थिक वर्ष २०७५÷०७६ को ५ करोड दुई लाख  ११ हजार ९४६ रुपिया बराबरको आय–व्ययसहितको आर्थिक प्रतिवेदन पारित गरेको छ । 
सो अवसरमा जनमुखी सहकर्मी अक्कलबहादुर केसी, फरक क्षमता भएका मनलाल गोपाली र अनुप विष्ट, उत्कृष्ट कारोबार गर्ने शक्ति रायमाझी, तारालाल श्रेष्ठ, पार्वती रायमाझी, सागर बलामी र कृष्ण कार्की, नेकपा थाहा नगर कमिटी अध्यक्ष अरुण रायमाझी र सहयोगी संस्था च्वाइस नेपाललाई सम्मान गरिएको थियो । 
साधारण सभाकै अवसरमा उक्त सहकारीले पालुङ बहुमुखी क्याम्पसका एक जना विद्यार्थीलाई ७ हजार ५ सय बराबरको छात्रवृत्ति उपलब्ध गराउने घोषणासमेत गरेको छ ।