विरोधपछि पछि हट्यो विभाग, साउन १ मै इम्बोस्ड नम्बर अनिवार्य नहुने

इम्बोस्ड नम्बर प्लेट जडान नगर्ने सवारीसाधनलाई आगामी साउनदेखि कारवाही गर्ने २० जेठको सूचनालाई यातायात व्यवस्था विभागले सच्याएको छ । 

विभागका अनुसार गत कात्तिकमै समयसीमा भएका र उक्त अवधिमा इम्बोस्ड जडान गर्नुपर्ने सवारी साधनको मात्रै आगामी साउनदेखि अनुगमन गर्ने भनिएको विभागले मंगलवार जारी गरेको सूचनामा उल्लेख छ ।

सरकारले २२ कात्तिक २०७८ मा जारी गरेको सूचना अनुसार १ मंसिर २०७८ देखि नयाँ सवारी दर्ता गर्दा अनिवार्य इम्बोस्ड नम्बर हुनुपर्ने व्यवस्था गरिएको थियो । उक्त सूचना अनुसार सोही वर्षको १ फागुनदेखि सवारी नामसारी गर्दा र १ जेठ २०७९ देखि सवारी दर्ता प्रमाणपत्र नवीकरण गर्दा इम्बोस्ड नम्बर लिनुपर्ने अनिवार्य व्यवस्था भएको थियो । 

सोही व्यवस्थाअनुसार कात्तिकमै जोड्नुपर्ने इम्बोस्ड नम्बर नजोडिएको विषयमा आगामी साउनदेखि अनुगमन गरेर कारवाही गर्ने भनिएको विभागको स्पष्टोक्ति छ । 

विभागका अनुसार नयाँ दर्ता भएका सवारीसाधनले पनि इम्बोस्ड नम्बर जडान नगरेको र इम्बोस्ड राख्ने विषय ऐच्छिक नभएको विभागले स्पष्ट पारेको छ । विभागका अनुसार ४० लाख सवारी साधनमा एकैपटक इम्बोस्ड जडान गर्न नसकिने विषयमा विभाग पनि जानकार रहेको बताएको छ । 

हाल दुई लाख ५० हजार इम्बोस्ड नम्बर छापिएर विभागमै थुप्रिएकाले पनि क्रमिक रूपमा सवारी साधनले जडान गर्दै जानुपर्ने विभागको भनाइ छ ।