वडा कार्यालय र बजार ब्यवस्थापन समितिले संरक्षण गर्न सकेनन् “डस्टबिन”

नगर सफा र स्वच्छ बनाउन थाहा नगरपालिकाका विभिन्न स्थानमा डस्टबिन राखियो तर त्यसको संरक्षण नहुदा अहिले कहिँ स्ट्याण्ड मात्र छ कहिँ फुटेका भाँडा मात्र त कतै केहीपनि छैन । थाहा नगरपालिकाले नगरको सरसफाईको लागि मुख्य बजारहरुमा राखिएको डस्टबिन ऐले कुनैपनि कामलाग्ने अवस्थामा छैनन । पहिलो चरणमा थाहा नगरपलिकाको १,२,३,४ र ६ का बजार क्षेत्रका विभिन्न स्थानमा स्थानिय स्तरमा निस्कने फोहोर व्यवस्थापनका लागि थाहा नगरपालिकाले सम्वन्धित वडा कार्यालय र बजारब्यवस्थापन समितिसंगको समन्वयमा डस्टबिन राखिएको थियो । हाल उक्त स्थानहरुका धेरै जसो डस्विनहरु सामान्य अवस्थामा छैनन् ।

थाहा नगरपालिका सामाजिक शाखाका प्रमुख अनिल लामिछानेले स्थानीय बजार ब्यवस्थापन समिति र वडा कार्यालयले प्रभावकारी ब्यवस्थापन गर्न नसक्दा नगरपालिकाको सरसफाई योजना प्रभावकारी हुन नसकेको बताउनुभयो । प्रति डस्टबिन करिब ७ हजार रुपैंया खर्चगरी बनाएर स्थानीय बजार ब्यवस्थापन समिति मार्फत बितरण गरिएको लामिछानेले बताउनुभयो । लामिछानेले मुख्य बजार क्षेत्रहरुमा करिब १०० वटा डस्टबिन बितरण गरिएको र हाल फुटेका, बिग्रेका डस्टबिन र स्ट्याण्डहरु परिवर्तन गर्ने र मर्मत गर्ने कार्य थालनी गर्ने र बजार ब्यवस्थापन समितिहरुलाई क्रियाशिल बनाउने बताउनुभयो ।

ईन्द्रसरोबर गाउँपालिका र थाहा नगरपालिकाले संयुक्त रुपमा फोहर ब्यवस्थापन गर्ने उद्देश्यले सेरिगेशन हाउस निर्माण गर्ने तयारी गरिरहेको र थाहा नगरपालिकाले फोहोरलाई बर्गीकरण गरी मोहोरमा परिणत गर्ने कार्यसमेत शुरु गरिसकेको लामिछानेले बताउनुभयो ।

मुख्य बजार क्षेत्रहरुमा करिब १०० वटा डस्टबिन बितरण गरिएको र हाल फुटेका, बिग्रेका डस्टबिन र स्ट्याण्डहरु परिवर्तन गर्ने र मर्मत गर्ने कार्य थालनी गर्ने र बजार ब्यवस्थापन समितिहरुलाई क्रियाशिल बनाईने

थाहा नगरपालिकाको वडा नम्बर १ ओखरबजार, वडा नम्बर २ फाँटबजार, वडा नम्बर ३ शिखरकोट, वडा नम्बर ४ दामन बजार लगायताको स्थानहरुमा राखिएका डष्टबिनहरु पनि काम नलाग्ने अवस्थामा छन् । ओखरबजार बजारब्यवस्थापन समितिका अध्यक्ष प्रबिण प्रधानले डस्टबिन राखेको २ बर्ष भईसकेकोले पुरानो भएर पनि भत्कने र फुट्ने गरेको बताउनुभयो । प्रधानले नगरपालिका समक्ष नयाँ डस्टबिनकोलागि माग गरेको समेत बताउनुभयो ।

बाटो हिड्ने ब्यक्तिहरुबाट निस्कने फोहरलाई ब्यवस्थित गर्न सडकको छेउछाउमा राखिएको डस्टबिनलाई स्थनीयहरुले डम्पिङ साईट जस्तै बनाउँदा समस्या आएको र छिट्टै ब्यवस्थित गर्ने वडा थाहा ६ का वडा अध्यक्ष शशिधर सुवेदीले बताउनुभयो । बजार ब्यवस्थापन समिति सरस्वतिबजार बज्रबाराहीका अध्यक्ष ईन्द्रबहादुर श्रेष्ठले लवग्रीन नेपाल नामक संस्था, थाहा नगरपालिका र बजार ब्यवथपन समितिको सहकार्यमा एक घर एक सेट डस्टबिनको ब्यवस्था गरी सरसफाईलाई ब्यवस्थित गर्ने योजना रहेको र केही स्थानहरुका बितरण गर्न शुरु गरिएको बताउनुभयो ।

हाल डस्टबिनहरुको अबस्था फोटो फिचर