मकवानपुरमा सत्ता गठबन्धन दलबिच यसरी हुँदैछ भागबण्डा

आगामी निर्वाचनमा मकवानपुरमा सत्तारुढ दलहरूबीच वडा तहसम्म गठबन्धन गर्ने सहमति भएको छ । नेपाली काँग्रेस मकवानपुरको कार्यालयमा शुक्रबार बसेको ५ दलका जिल्ला नेतृत्वकर्ताको बैठकले केन्द्रको निर्णयलाई अनुसरण गर्दै आगामी निर्वाचनमा १० स्थानीय तहको १०२ वटै तहमा नै गठबन्धन गर्ने सहमति निकालेको हो ।
उक्त सहमति अनुसार ५ दलीय गठबन्धनले वडा तहसम्म उम्मेदवार उठाउनका लागि जिल्ला, पालिका र वडा तहस्तरमा नै बैठक बसेर संयन्त्र तयार पारिने भएको छ ।

त्यस्तै गठबन्धनको सफल कार्यान्वयनका लागि जिल्लामा सभापति बुद्ध लामाको संयोजकत्वमा, नेकपा माओवादी केन्द्रका सर्केश घलान, नेकपा एकीकृत समाजवादी श्रीधर पोखरेल, जनता समाजवादी पार्टीका सोनामसिंह स्याङ्तान र राष्ट्रिय जनमोर्चाका प्रतिनिधि सदस्य रहने गरी सचिवालय स्थापना गर्ने सहमति भएको छ ।
वडा र पालिका तहमा पनि सोही प्रकृतिको सचिवालय निर्माण गरेर गठबन्धनको सफल कार्यान्वयनका लागि अघि बढ्ने सहमति भएको छ ।

यसरी हुँदैछ भागबण्डा
मकवानपुरमा आगामी निर्वाचनका लागि वडा तहमा नै गठबन्धन हुने भएपछि ५ वटै दलले भागबण्डाको लागि आ–आफ्नोतर्फबाट दाबी प्रस्तुत गर्ने तयारीमा रहेका छन् । विगतको निर्वाचनको सफलता, संगठन संरचना, कार्यकर्ताको उपस्थिति र जनमतको आधारमा गठबन्धनमा आबद्ध दलहरूले आ–आफ्नो तर्फबाट भागबण्डाका लागि दाबी पेश गर्ने भएका छन् ।
दलीय हैसियत अनुसार मकवानपुरको १० वटा पालिका र १०२ वटा वडाहरूमा पदीय भागबण्डा गर्ने खाकामा गठबन्धनका दलहरू सहमत भएको नेकपा एकीकृत समाजवादी पार्टीका अध्यक्ष श्रीधर पोखरेलले जानकारी दिए ।
सबै दलहरुको १०२ वटै वडामा संगठनहरु निर्माण भएकाले त्यसको अवस्था, वडा तहमा हुने पार्टीको कार्यक्रममा कार्यकर्ताहरुको उपस्थिति, संगठित सदस्यको विस्तारको आधारमा भागबण्डा गरिने उनले बताए ।
एकीकृत समाजवादी मकवानपुरमा चौथो शक्तिको रूपमा स्थापित भइसकेको उनको दाबी छ । उनले विगतको निर्वाचनमा गठबन्धनका दलहरूले जितेका पालिकामा जुन दलले जितेका छन् त्यहाँ त्यही दललाई दिने र एमालेले जितेका पालिकामा भने सम्मान जनक रूपमा भागबण्डा हुने उनले बताए ।

उनका अनुसार एकीकृत समाजवादीले मकवानपुरमा विगतको निर्वाचनमा एमालेबाट उम्मेवार भइ जितेका २ जना पालिका अध्यक्षहरुले सनाखत गरेकाले सो पालिका सहित एमालेले जितेका ४ वटा पालिकामा पनि सम्मानजनक भाग खोज्नेछ ।
‘विगतमा काँग्रेसले जितेको स्थानमा पनि अन्य दलको उपस्थिति बलियो भएको अवस्था छ । त्यसको पनि मुल्याङ्कन गर्ने काम हुन्छ । आगामी निर्वाचनको उम्मेदवारी दर्ताको क्रममा संगठनको अवस्था, जनमत र पार्टीका कार्यक्रममा उपस्थित हुने कार्यकर्ताको अधारमा भागबण्डा हुन्छ । विगतमा एमालेबाट जितेका २ जना पालिका अध्यक्ष हामीसँग हुनुहुन्छ । त्यस्तै अघिल्लो निर्वाचनमा काँग्रेस र माओवादीले पनि २÷२ वटा पालिका जितेका थिए । त्यसलाई कायम राख्दै एमालेले जितेका ४ वटा पालिकाको सम्मानजनक भागबण्डा हुन्छ,’ उनले भने ।
वडा तहमा गठबन्धनबाट उम्मेदवार छान्ने क्रममा वडातहको संगठनको संरचनाका आधारमा भागबण्डा गर्ने योजना रहेको उनले बताए ।
‘वडा तहमा हाम्रो धेरै संख्यामा निर्वाचित अध्यक्ष छैनन् । त्यसो भनिरहँदा हामी कमजोर छौं भन्ने होइन । हामी डोमिनेट भएर बस्नुपर्ने स्थिति पनि छैन । सबै वडाहरूमा हाम्रो संगठन छ । त्यसमा कार्यकर्ताको उपस्थिति पनि राम्रो नै छ । त्यसमा पनि हामी उचित स्थान माग गर्छौँ,’ उनले भने ।

माओवादी केन्द्र र एकीकृत समाजवादी मात्र मिलेमा मात्र पनि ४ वटा पलिकामा सहजै जित्न सकिने दाबी गर्दै उले ठुूलो दलको हैसियतमा रहेको काँग्रेसले पनि उचित स्थान दिनुपर्ने उनले बताए ।