नित्य पूजा गरियो, अम्बे जात्रा सकियो

थाहा नगरपालिका वडा नम्बर १० चित्लाङ बिसिङ्खेलमा हरेक वर्षको कार्तिक १ गते लाग्ने अम्बे जात्रा यसपाली औपचारिकतामा सीमित भएको छ । कोरोना भाइरसको जोखिम कायमै रहेको र भीडभाडमा जाँदा कोरोना संक्रमणको जोखिम बढी हुने भएको भन्दै वडा कार्यालयले सूचना जारी गरेपछि यसवर्षको अम्बे जात्रा नित्य पूजामा सीमित भयो । 

जात्रा भनेर विसिङ्खेलस्थित चम्पाकेश्वर मन्दिर परिसरमा हुल बाँधेर कोही आएनन् । कसैले पसल पनि राखेन । आज चम्पाकेश्वर महादेवको दर्शन गर्ने केही भक्तजनहरु र नित्य पूजामा सहभागीहरु पनि भेटिए । महादेव मन्दिर परिसरबाट थाहा नगरपालिका १० नम्बर वडा अध्यक्ष हिराबहादुर गमालले थाहापाटीसित भन्नुभयो, ‘तपाईंहरुको प्रचारले राम्रो सहयोग ग¥यो । हामी रहे त फेरि पनि जात्रा मनाउँला । यसपाली अम्बे जात्रा नित्य पूजामै सीमित रह्यो ।’

हाम्रा स्थानीय सहकर्मी विराजन बस्नेत रिपोर्टिङको शिलशिलामा मन्दिर परिसर पुग्नु भएको थियो । मन्दिर पुगेपछि उहाँले भन्नुभयो, ‘बिगत बर्षहरुमा निकै भिडभाड हुने गरेको भए पनि यसपाली  नित्य पूजा मात्रै भएको देखियो । यहाँ ३६५ घैला पानीले महादेबलाई स्नान गरेपछि फुलपाता चढाउने चलन छ । स्थानीयले त्रिसूल र फुलपाता चढाउने गर्छ्न ।’ 

यसपालीको अम्बे जात्रामा अघिल्ला वर्षहरुमाजस्तो बजार राख्ने, लाखवत्ती बाल्ने, रुद्री गर्ने जस्ता क्रियाकलापहरुसमेत बन्द गरिएको थियो । जात्रामा हरेक वर्ष मकवानपुरबाट मात्र नभई धादिङ, काठमाण्डौं, भक्तपुर, ललितपुर लगायतका जिल्लाहरुबाट समेत भक्तजनहरुको घुईंचो लाग्ने गरेको थियो । 

अम्बे जात्रालाई स्थानीय गोपालीहरुले विशेष महत्व दिएर मनाउने गरेका थिए । स्थानीय न्हुँलगाउँ, टौखेल, कलाँटु र अम्बुटोलका बासिन्दाले प्रत्येक वर्ष जात्रामा विशेष पूजाका लागि महादेवलाई जाँड र एकैपटक कुटिएको चिउरा चढाउने प्रचलन रही आएको छ । गोपालीहरुले टाउकोमा पगरी  र फूल सिउरेर घरबुना खेसका कपडा लगाएर नाच देखाउने चलनसमेत रहेको छ । 

चम्पाकेश्वर मन्दिरमा प्रयोग गरिएको सम्पूर्ण काठ चाँपको रहेको छ । चाँपको रुखको फेदमा उत्पत्ति भएको भन्ने किंवदन्तीअनुसार स्थानीयहरु चम्पाकेश्वर महादेवको रुपमा पुज्दछन् । चम्पाकेश्वर महादेवको पूजा गरे गाउँमा पानी पर्ने र गाइबस्तु पालन फस्टाउने स्थानीयहरुको विश्वास रही आएको छ ।