नगरप्रमुख र बजार व्यवस्थापनबीच छलफल, लकडाउन हुने संकेत
अहिले थाहा नगर कार्यपालिकाको बैठक बस्दै

थाहा नगरपालिकाका प्रमुख लवशेर विष्टले थाहा नगरका विभिन्न बजार क्षेत्रमा गठित बजार व्यवस्थापन समितिका प्रतिनिधिहरुसँग छलफल गर्नुभएको छ । उहाँले बजार व्यवस्थापन समितिका अध्यक्षहरुलाई नगरपालिकामै बोलाएर छलफल गर्नुभएको हो । नगर उपप्रमुख खड्गा गोपालीसहित भएको छलफल भर्खरै सकिएको छ । 

हिजो सोमबार भएको सर्वपक्षीय बैठकमा थाहानगरमा कोरोना संक्रमणलाई नियन्त्रणमा राख्न लकडाउन घोषणा गर्न सुझाव दिइएपछि नगरप्रमुख विष्टले बजार व्यवस्थापन समितिका अध्यक्षहरुलाई आज डाक्नु भएको हो । 

नगर कार्यपालिकाको बैठकले लकडाउन गर्ने निर्णय गरेमा यसको कार्यान्वयनमा बजार व्यवस्थापन समितिको भूमिका महत्वपूर्ण हुने भएकोले उनीहरुको प्रतिवद्धता लिन छलफल गरिएको छलफलमा सहभागी एक सदस्यले बताउनु भयो । 

‘छलफलमा लगभग एक साताको लकडाउन हुने संकेत पाएका छौं,’ उहाँले थाहापाटीसित भन्नु भयो । थाहा नगरपालिकाले अत्यावश्यक सेवाबाहेक बन्द हुने गरी लकडाउनसम्बन्धी निर्णय गर्ने संकेत पाएको श्रोतको भनाइ छ । 

बैठकमा सहभागी सरस्वति बजार व्यवस्थापन समितिका अध्यक्ष इन्द्रबहादुर श्रेष्ठले लकडाउन भएमा लकडाउन कार्यान्वयनमा आफूहरुको सहयोग रहने बताउनु भयो । 

त्यस्तै, शिखरकोट बजार व्यवस्थापन समितिका अध्यक्ष मनोज रायमाझीले लकडाउन घोषणा भएमा बजारको निगरानी गर्न आफूहरु तयार रहेको तर लकडाउन उल्लंघन गर्नेलाई कारबाही गर्ने सीमित अधिकार बजार व्यवस्थापन समतिसँग पनि हुनु पर्ने सुझाव दिएको बताउनु भयो । 
छलफलमा शिखरकोट, थानाबजार, ओखरबजार, घर्तिखोला, खाल्डेबजार, सरस्वतिबजार लगायत विभिन्न बजारका बजार व्यवस्थापन समितिका प्रतिनिधिहरुको सहभागिता रहेको थियो । 

बजार व्यवस्थापन समितिको छलफलपछि अहिले थाहा नगर कार्यपालिकाको बैठक बस्दैछ ।