दुम्सीखर्क बाट १५ सय किलो गाँजा सहित ७६ बर्षको जित बहादुर मोक्तान सहित ५ जना पक्राउ

मकवानपुर प्रहरीले ठुलो परिमाणको अवैध लागू औषध गाँजा, चरेश तथा हतियारसहित पाँच जनालाई पक्राउ गरेकाे छ।

जिल्लाको कैलाश गाउँपालिका–६ दुम्सी खर्कमा रहेको ७६ वर्षका जितबहादुर मोक्तानको गोठबाट १५ क्विन्टल १५ किलो गाँजा तथा १३ किलो चरेश फेला पारेको हो। 

विशेष सूचनाको आधारमा मोक्तानको घर र गोठमा खानतलासीको क्रममा गाँजा र चरेशसँगै एक थान भरुवा बन्दुक, एक थान कटुवा पेस्तोल र म्यागेजिन सहित ६ राउण्ड गोली फेला परेको जिल्ला प्रहरी कार्यालय मकवानपुरका प्रमुख (प्रहरी उपरीक्षक) बामदेव गौमतले जानकारी दिए। 

प्रहरीले जितबहादुर मोक्तानसहित स्थानीय २८ वर्षीय विजय मोक्तान, ४० वर्षका रत्न घले, २२ वर्षका अशोक घले, २२ वर्षकै शिखर घलेलाई पक्राउ गरेकाे हो। 

‘कैलाश ६ का जितबहादुर मोक्तानको गोठबाट एक हजार ५१५ किलो गाँजा, १३ किलो चरेश, एक थान गाँजालाई च्याप्ने काठको फर्मा, र एक थान तराजु नियन्त्रणमा लिएका छौँ’, गौतमले भने, ‘यस कार्यमा संलग्न भएका ५ जनालाई समेत नियन्त्रणमा लिएका छौँ।’ 

जिल्ला प्रहरी कार्यालय मकवानपुरबाट प्रहरी निरीक्षक केशरकुमार न्यौपाने, प्रहरी सहायक निरीक्षक नविनविक्रम थापा तथा इलाका प्रहरी कार्यालय पालुङबाट प्रहरी नायब निरीक्षक उमेशप्रसाद कोईरीको टोलीले उनीहरूलाई पक्रेको हो। 

पक्राउ परेका पाँचै जनालाई जिल्ला प्रहरी कार्यालयमा राखेर आवश्यक अनुसन्धान एवम् कारबाही प्रक्रिया अघि बढाइएको प्रहरी उपरीक्षक गौतमले बताए।