थाहा बसपार्क संचालनको लागि तयारी पूरा, कार्तिक १९ देखि काउन्टर संचालनमा आउने

मकवानपुर । स्थानीय युवाहरूको निरन्तर दबाब र सक्रिय पहलपछि थाहा नगरपालिका वडा नं. ४ नार्खुढाँडमा अवस्थित थाहा बसपार्क अब संचालनमा आउने भएको छ।
थाहा ४ किटेनीका युवाहरूले निरन्तर दवाब दिँदै आएका कारण थाहा नगरपालिकाले बसपार्क संचालनका लागि आवश्यक तयारी तीव्र पारेको हो। बुद्धचोक थानाबजार बजार व्यवस्थापन समितिका सचिव ज्ञानेन्द्र अधिकारीका अनुसार बसपार्कमा बिजुली जडान, खानेपानी, शौचालय र यात्रु बस्ने कुर्सी लगायतका आधारभूत पूर्वाधारको व्यवस्था भइसकेको छ।
उनका अनुसार कार्तिक १९ गतेदेखि बसपार्कबाट यात्री बाहक बस, सुमो, इभि लगायतका सवारी साधनहरू छुट्ने गरी तयारी लगभग पूरा भइसकेको छ।

यसैबीच नारायणी यातायात व्यवसायी संघमा आवद्ध यात्रुवबहाक सवारी साधानहरु ‘थाहा बसपार्क’बाटै सञ्चालनको व्यवस्था मिलाउन थाहा नगरपालिकाले नारायणी यातायात संघलाई परिपत्र गरेको थियो।

नारायणी यातायात व्यवसायी संघका प्रतिनीधिहरुले बसपार्क सञ्चालनका लागि तयार गरिएको संरचनाहरुको समेत स्थानीय सुरक्षा निकायका प्रतिनीधिसहितको उपस्थितीमा निरीक्षण समेत गरेको अधिकारीले प्रतिक्रिया दिए ।
यसअघि ७ कार्तिकमा स्थानीयले सांकेतिक विरोध प्रदर्शन गरेका थिए। त्यसपश्चात् ८ कार्तिकमा स्थानीय युवा, थाहा नगरपालिकाका प्रमुख, उपप्रमुख, वडा अध्यक्ष लगायतको टिमबीचको छलफलपछि बसपार्क संचालन गर्ने सहमति भएको थियो।
वि.सं. २०७५ सालदेखि निर्माण सुरू भएको बसपार्कमा पक्की सडक, टिकट काउन्टर, र शौचालय निर्माण कार्य पूरा भइसकेको छ।
बसपार्क सञ्चालनमा आएपछि हाल शिखरकोट क्षेत्रमा हुने सवारी भिडभाड कम भई यातायात व्यवस्थापनमा सहजता आउने अपेक्षा गरिएको छ।