थाहा नगरपालिकामा ४ दिन पूर्ण निषेध,
थाहामा सक्रिय संक्रमितको संख्या ३ सय ११ निको हुनेको संख्या २२ पुग्यो,

थाहानगरमा कोरोना संक्रमण दर डर लाग्ने गरी उकालो लागेपछि जेठ १२ गते विहानदेखि १५ गते राती १२ बजेसम्म ४ दिन पूर्ण रुपमा निषेधाज्ञा गर्ने भएको छ । आज नगरस्तरीय कोभिड रोकथाम तथा नियन्त्रण निर्देशन समितिको बैठकले नगरमा कोरोना संक्रमण नियन्त्रण बाहिर जान खोजेपछि निषेधाज्ञालाई कडाइ गर्ने निर्णय गरेको हो । लक्षण भएकाहरु र संक्रमितको कन्ट्राक्ट ट्रेसिङको आधारमा परिक्षणको दायरा बढाउदै लाने समेत निर्णय गरेको छ । निषेधाज्ञा अवधिभर औषधि पसल, कृषि उत्पादन बाहेक सबै व्यवसाय बन्द रहने छन् । हाल हरेक दिन विहान ५ बजेदेखि ८ बजेसम्म अत्यावश्यक वस्तु (खाद्यान्न, तरकारी, दूध, माछा मासु) पसल खुल्ला गर्न छुट थियो । तर, अब जेठ १२ गते बुधबारदेखि यी सबै पसलहरु पूर्णरुपले बन्द हुनेछन् । कोहि कसैलाई दैनिकी चलाउन समस्या भएमा वडाध्यक्ष, थाहानगर उद्योग वाणिज्य संघलगायतमा सम्पर्क गर्न अनुरोध गरेको छ । कृषि उत्पादनका लागि कृषक पूर्ण रुपले स्वास्थ्यका मापदण्ड पालना गरि घरबाट खेतबारी, तरकारी गोदामसम्म र गोदामबाट सिधै घरसम्म मात्र आवतजावत गर्न भनिएको छ । बैठकले एम्बुलेन्स, प्रेसका सवारी, तरकारी निकासीका सवारी बाहेक अन्य सबै खाले सवारी संचालनमा रोक लगाउने निर्णय समेत गरेको छ । यसबीचमा, नगर बाहिरबाट आउने सवारी साधन समेत निषेध गर्ने निर्णय गरेको छ । बैठकले निषेधाज्ञाको अवज्ञा गरेको पाइएमा कोरोना संक्रमण अवधिमा लगाइने सबैखाले निषेधाज्ञा अवधिभर पसल सिल गर्ने निर्णय गरेको छ । ािषेधाज्ञालाई प्रभावकारी वनाउनका लागि उप प्रमुख खड्ग गोपालिको संयोजकत्वमा गठित अनुगमन समिति मार्फत अनुगमनलाई निरन्तरता दिने निर्णय गरिएको छ । आजको वैठकले नगर स्तरीय कोभिड नियन्त्रण निर्देशक समितिमा संचारकर्मीहरुको तर्फवाट कुमार नेगी र इच्छापूर्ण कार्कीलाई समितिको सदस्यमा मनोनित गर्ने निर्णय गरेको छ । 
थाहानगरमा दोस्रो भेरियन्टपछि पछिल्लो पिसिआर र एन्टिजेन शनिवारको पछिल्लो रिपोर्ट अनुसार कुल ३ सय ३६ जना कोरोना संक्रमित भएका छन् । 
होम आइसोलेसनमा बसिरहेका कोरोना संक्रमितमध्य शनिबार १० जना निको भएका छन् । हालसम्म निको हुनेको संख्या २२ जना पुगेको छ । थहामा ३ जनाको मृत्यु भैसकेको छ भने थाहानगर बाहिर १० जनाको उपचार भैरहेको छ ।