थाहा नगरपालिकाको वेबसाइट इन्डोनेसियाली ह्याकरको नियन्त्रणमा,

मकवानपुरको थाहा नगरपालिकाको वेबसाइट ह्याक भएको छ । नगरपालिकाको नाममा दर्ता गरिएको सबडोमेन https://khanepani.thahamun.gov.np/c0p.html मा अनाधिकृत रूपमा 'c0p.html' नामको एचटीएमएल फाइल भेटिएपछि वेबसाइट ह्याक भएको खुलासा भएको हो ।

ह्याकरले वेसबाइट नियन्त्रणमा लिई इन्डोनेसियाली भाषामा ‘Jangan suka nunda, nanti keburu tidur’ अर्थात् ‘ढिलासुस्ती गर्न मन नपराऊ, तिमीलाई निद्रा लाग्नेछ’ भन्ने सन्देश छोडेका छन् ।

आक्रमणकारीहरूले आफूलाई इन्डोनेसियाली ह्याकर भएको र './SaklarRusak' उपनाम प्रयोग गर्ने ‘TSecNetwork’ ह्याकर समूहसँग आबद्ध रहेको दाबी गरेका छन् । यो समूहमा इन्डोनेसिया, चीन र रुसका सदस्य रहेको बताइएको छ ।

ह्याकिङ फोरममा सूचीकृत

ह्याकरहरूले आफ्नो पहिचान खुलाउने क्रममा जोन-एच (Zone-H) आर्काइभ र टिकटक ह्यान्डल ‘.saklarrusak’ को लिङ्क पनि वेबसाइटमा राखेका छन् । जोन-एच ह्याक भएका वेबसाइटहरूको रेकर्ड राख्ने र साइबर सुरक्षासम्बन्धी समाचार प्रकाशन गर्ने एक चर्चित प्लेटफर्म हो ।

ह्याकरले वेबसाइटमा 'Sudat Kantin' को इमेज प्रयोग गरेका छन् । ‘Sudat Kantin’ इन्डोनेसियाको एक कम्युनिटी मिडिया प्लेटफर्म हो । यसले सामाजिक-राजनीतिक मुद्दाहरूमा सामग्री प्रकाशन गर्छ । यहीकारण ह्याकर र उक्त प्लेटफर्मबीचको सम्बन्धको अनुमानलाई बलियो बनाएको न्यौपानले उल्लेख गरेका छन् ।

साइट ह्याक गर्न प्रयोग गरिएको एचटीएमएल कोड

यस घटनाबारे थाहा नगरपालिका भने अनभिज्ञ देखिएको छ । नगरपालिकाका सूचना अधिकारी सुरज कुमार भुजेलले यसबारे आफूहरूले बुझ्ने प्रतिक्रिया दिए । उनले टेकपानासँग भने, “हामीलाई यो घटनाबारे जानकारी छैन । अब बुझ्छौं ।”

यो घटनाले नेपालका सरकारी वेबसाइटको सुरक्षामाथि थप प्रश्न खडा गरेको अनुसन्धानकर्मी न्यौपानेले उल्लेख गरेका छन् । पछिल्लो समय नेपालका सरकारी वेबसाइट ह्याकिङका घटना बढ्दै गएका छन् । साइबर सुरक्षा विज्ञहरूले सरकारी निकायलाई आफ्नो वेबसाइटको सुरक्षा व्यवस्था बलियो बनाउन सुझाव दिएका छन् ।

ह्याकरले प्रयोग गरेको ‘Sudat Kantin’ को इमेज

टेकपाना बाट