थाहामा वडाध्यक्ष सहित दुई दर्जन बढी कोरोना संक्रमित
सुरेन्द्रमान प्रधान

कोभिड-१९ को दोश्रो लहरसङ्गै थाहानगर दिनानु दिन आक्रान्त बन्दै गएको छ । पछिल्लो समय शुक्रबारसम्म थाहानगरका एक वडा अध्यक्षसहित २७ जना कोरोना संक्रमित भएको थाहा नगरपालिका स्वास्थ्य शाखाले जनाएको छ ।

२७ मध्ये ८ महिला र १९ पुरुष रहेको स्वास्थ शाखा अधिकृत मेघराज बलामीले बताए । थाहा १ का वडा अध्यक्ष हेरमान गोपाली समेत कोरोना संक्रमित भएका छ्न् । शुक्रबारसम्म नगरका ६ कर्मचारी, २ जना स्वास्थ्यकर्मी पनि संक्रमित भएका छन । संक्रमितहरुमा ३ वर्षका बच्चा देखि ५० वर्ष उमेर समुहका छन् । एन्टीजेन परिक्षणबाट संक्रमितहरुको पुष्टी भएको हो । संक्रमित सबै 'होम आइसोलेशन'मा छन् ।

नगरपालिकाले आफ्ना कर्मचारीहरुमा कोरोना संक्रमण बढेसङ्गै बिहीबारदेखि नै सर्वसाधारणका लागि सेवा बन्द गरेको छ । कोरोनाको जोखिम बढेसङ्गै पालुङ प्रहरीले बाटोमा हिड्ने सर्वसाधारणलाई समेत मास्क अनिवार्य लगाउन आग्रह गरेको छ । जोखिम बढेसङ्गै बजारमा चहलपहल कम हुँदै गएको छ । थाहा नगरपालिकाले व्यवस्था गरेको क्वारेन्टाइन र आइसोलेशन चाहिँ शुक्रबारसम्म खाली नै छ । पछिल्लो समय संक्रमणको दर बढेपछि आफ्ना सदस्य व्यवसायीहरुलाई सुरक्षित भएर व्यवसाय गर्न थाहानगर उद्योग वाणिज्य संघले आव्हान गरेको छ । संघले कोरोना संक्रमित भएमा तत्कालका लागि व्यवसाय बन्द गरि सुरक्षित भएर बस्न पनि आव्हान गरेको छ । संघले आफ्ना सदस्यहरुलाई अनिवार्य रुपमा मूल्य सुचि राखी आयात तथा निर्यात गर्न सुचित गरेको छ ।