थाहामा भदौ १५ सम्म निषेधाज्ञा थपिने

छिमेकी जिल्लाहरु तथा सदरमुकाममा कोभिड १९ (कोरोना भाइरस) संक्रमितका बिरामीको संख्या बढेपछी भाद्र ३ गते विहान १२ बजेदेखि थाहा नगरपालिकामा लागू गरिएको निषेधाज्ञा आगामी भाद्र १५ गतेसम्मका लागि थप गर्न सिफारिस गर्ने निर्णय गरिएको छ ।

सोमबार जेसीज हलमा आयोजित समीक्षा बैठकमा सहभागीहरुले स्वाव संकलनको अवस्था रहेकोले सो अवधिसम्मका लागि निषेधाज्ञा जारी गर्ने सिफारिस गरिएको हो ।

नगर प्रमुख लवशेर बिस्टले सहभागीहरुको अनुरोधलाई सुल्झाउन जिल्ला प्रशासन कार्यालय मकवानपुरलाई अनुरोध गर्ने बताउनु भयो । नियमित अनुगमनको क्रममा अघिल्लो लकडाउन भन्दा यसपटकको निषेधाज्ञामा आम व्यवसायीहरुले सघाएको नगर उपप्रमुख खड्ग गोपालीले बताउनु भयो । बैठकमा नगरका सरोकारवाला संघ सन्था, राजनीतिक दललगायतका प्रमुख तथा प्रतिनिधिहरुको सहभगिता थियो ।

बैठकले निषेधाज्ञा अटेर गर्नेहरूलाई प्रचलित कानून बमोजिम कार्वाही गर्न प्रशासनलाई सुझाव दिएको छ । इप्रका पालुङ्गका प्रमुख विकास कुमार तमाङ्गले सबै नागरिकको सहयोग रहेमा प्रहरी तत्काल सुरक्षा सेवामा लाग्ने बताउनु भयो । प्रहरी निरीक्षक तमाङ्गले निषेधाज्ञा अटेर गरेको पाइएमा तत्काल खवर गर्न अनुरोध गर्नुभयो । बैठकले बैंक तथा वित्तीय सन्थाहरु समेत बन्द गर्न सुझाव दिएको छ । कतिपयले भने समान रुपले कार्यान्वयन गर्न सुझाव दिएका छन् ।

पछिल्लो समय प्रत्येक वडाबाट २०/२० जनाको दरले स्वाव संकलन गर्ने अभियान संचालित छ । तर, सोमबारसम्म पिसिआरको नतिजा आइसकेको छैन । यसअघि करिव ४ सय जनाको पिसिआर परिक्षण गरिसकेको छ । तीमध्ये १२ जनामा कोरोना संक्रमण देखिएको थियोभने ७ जना उपचारपछी घर फर्किएका छन् भने ५ जना उपचार गरिरहेका छन् । यद्यपि सक्रमित सबै थाहा नगरमै निरन्तर बसोवास गरिरहेका व्यक्तिहरु भने होइनन् ।