थाहामा प्रतिपक्ष दलहरु सक्रिय, बिकास निर्माण र कर्मचारीको सेवासुविधाको हिसाब माग

थाहा नगरपालिकामा प्रतिपक्ष दलहरु सक्रिय भएका छन् । दुई तिहाईभन्दा बढी जनप्रतिनिधिहरु नेकपाबाट निर्वाचित भएको नगरपालिकामा नेकपाइतर दलहरु एकजुट भएका हुन् । नगरमा क्रियाशील नेकपाबाहेक पाँच राजनीतिक दलहरु संगठित भएर अन्तरपार्टी सञ्जालसमेत गठन गरेका छन् । 

प्रतिपक्ष दलहरुको सञ्जालले सोमबार थाहा नगरपालिकामा जनप्रतिनिधि निर्वाचित भएदेखि हालसम्मको विकास निर्माणको विवरण माग गरेको छ । त्यसैगरी थाहा नगरपालिकामा सबै कर्मचारीहरुको नाम, पद र उनीहरुले खाइपाई आएको तलब तथा सेवा सुविधाको विवरण समेत माग गरेको जनता समाजवादी पार्टी वागमती प्रदेश सदस्य इन्द्रबहादुर श्रेष्ठले बताउनु भयो ।

थाहानगर प्रतिपक्ष पार्टी सञ्जालमा नेपाली काँग्रेस, जनता समाजवादी पार्टी(जसपा), राप्रपा, राष्ट्रिय जनमोर्चा र विवेकशील साझा पार्टी रहेका छन् । उनीहरुको संयुक्त टोलीले सोमबार थाहा नगरपालिकाका प्रमुख लवशेर विष्टलाई भेटेर अन्तरपार्टी सञ्जालको निर्णयबमोजिम सूचना विवरण माग गरेका छन् । 

संजालले नगरपालिका प्रमुखबाट तोक आदेश गराई सूचना शाखामार्फत् विवरण माग गरेको जसपा प्रदेश सदस्य श्रेष्ठले जानकारी दिनुभयो ।
संजालले नगरपालिकालाई पत्र लेखेर सार्वजनिक जानकारीको लागि सूचनाको हकसम्बन्धी ऐन २०६४ को दफा ३ र ७ अनुसार प्रमाणित प्रतिलिपि उपलब्ध गराउन माग गरेको छ । 

राष्ट्रिय सूचना आयोगलाई बोधार्थ दिएर लेखिएको उक्त पत्रमा नेपाली काँग्रेसका नगर सभापति योगेन्द्रमान श्रेष्ठ, जनता समाजवादी पार्टीका क्षेत्र  नं. २ इन्चार्ज ईन्द्रबहादुर श्रेष्ठ, राष्ट्रिय प्रजातन्त्र पार्टीका नगर अध्यक्ष हरेराम कार्की, राष्ट्रिय जनमोर्चाका नगर अध्यक्ष दिनेश विष्ट र विवेकशील साझा पार्टीका नगर अध्यक्ष माधव कार्कीले हस्ताक्षर गरेका छन् ।