थाहामा आइतबार एक जना कोरोना संक्रमित थपिए, ९ दिन गाउँमा बसेपछि मात्रै क्वारेन्टाइन गएका थिए उनी, नालीबेली यस्तो छ 

क्वारेन्टाइनमा जानुभन्दा ९ दिन अघि उनी गाउँ आएका थिए । सँगै एउटै मोटरसाइकलमा आएका उनका बज्रबाराहीका साथी गाउँ आएको दिन घरमा नगई क्वारेन्टाइन गए । तर उनीचाहिँ घरमै गएर बसे । काठमाण्डौंबाट मोटरसाइकलमा संगै आएका उनीहरु थाहा–१ को ओखरबजारबाट छुट्टिएका थिए । 

क्वारेन्टाइनमा गएपछि उनका साथीले क्वारेन्टाइन व्यवस्थापनलाई आफू एक्लै आएको बताए । पछि उनी दुई जनाको सम्बाद भयो कि भएन जानकारी छैन । तर उनी क्वारेन्टाइनमा गएनन् । परिवारले पनि क्वारेन्टाइनमा जान भनेन । छिमेकीहरु पनि चुप लागे । अन्ततः उनलाई कोरोना संक्रमण देखियो । 

थाहा नगरपालिका वडा नं. २ इन्द्रायणी बस्तीका ३० वर्षीय पुरुषमा आइतबार कोरोना संक्रमण देखिएको हो । हेटौंडास्थित प्रयोगशालामा उनको स्वाबको पिसिआर विधिबाट परीक्षण गरिएको थियो । प्रयोगशालाले यसबारे पुष्टि गरेको छ । 

गत भदौ १७ गते अबेर उनी घर आइपुगेका थिए । त्यसयता भदौ २५ गतेसम्म उनी गाउँमै थिए । उनी काठमाण्डौंको भद्रकाली ब्यारेकमा नेपाली सेनामा कार्यरत छन् । एउटै व्यारेकमा कार्यरत उनका थाहा ६ बज्रवाराहीका साथी  क्वारेन्टाइनमा बसेको अवस्थामा कोरोना संक्रमण देखिएपछि थाहा नगरपालिकाका डाक्टरसहितको टिमले कहाँकहाँ पुगेको, कसकसलाई भेटेको भनी सोधपुछ गरेको थियो । त्यसपछि मात्रै उनले थाहा नगरपालिकाको वडा नं. २  बस्ने एक जना नेपाली सेनाको एउटै ब्यारेकमा कार्यरत साथी आफूसँगै आएको  बताएका थिए ।  संक्रमितले सूचना लुकाउँदा थाहामा कोरोनाको जोखिम बढ्यो भन्दै त्यही बेला थाहानगरमा त्रास व्यक्त गरिएको थियो । 

कन्ट्याक्ट ट्रेसिङमा परेपछि मात्र उनलाई भदौ २५ गते बज्रवाराहीस्ति क्वारेन्टाइनमा लगिएको थियो । २६ गते उनको स्वाब संकलन गरियो । २९ गते आइतबार परीक्षण गर्दा कोरोना संक्रमण देखियो । 
थाहानगर आउनुअघि उनी बीरगन्ज पुगेर काठमाण्डौं फर्किएका थिए । त्यसपछि लगत्तै पालुङ आएका थिए । घरमै बसिरहेका उनलाई ९ दिनपछि क्वारेन्टाइन पठाएपछि उनका परिवारका ६ जनालाई होम क्वारेन्टाइनमा बस्न भनिएको थियो । उनमा संक्रमण देखिएपछि थाहा नगरपालिकाले कन्ट्याक्ट ट्रेसिङ शुरु गरेको छ । 

बज्रवाराहीस्थित क्वारेन्टाइनमा रहेका उनलाई कोरोना देखिए पछि शनिबार कोरोना संक्रमित ४ जनासँगै हेटौंडास्थित आइसोलेसन पठाउने तयारी थालिएको छ  ।