थाहाको सतिखोलामा पक्की पुल निर्माण कार्य तीव्र

उत्तरी मकवानपुरस्थित थाहा नगरपालिकाको इन्द्रायणी चौर सति खोलामा पक्की पुल निर्माण कार्य तीव्र रुपमा भइरहेको छ । बागमती प्रदेशको भौतिक पूर्वाधार विकास मन्त्रालयअन्तर्गत पूर्वाधार विकास कार्यालयको रु. पाँच करोड ७४ लाख लागतमा सडक पुल निर्माण भइरहेको हो ।

पुल निर्माण अन्तर्गत अहिले धमाधम ‘फाउण्डेशन’ को कार्य भइरहेको निर्माणको ठेक्का पाएको सपना निर्माण सेवाका प्रतिनिधि आकास गुप्ताले जानकारी दिनुभयो । पूर्वाधार विकास कार्यालयले सपना निर्माण सेवालाई आगामी २०७९ साल जेठ २० गतेभित्र सम्पन्न गर्ने गरी निर्माणको ठेक्का दिएको छ ।

नेपालकै एक मात्र कृत्रिम जलाशय कुलेखानी जलविद्युत केन्द्रको प्रमुख जलाधारको रुपमा रहेको पालुङ खोलाअन्तर्गत सति खोलामा पक्की पुल नहुँदा वर्षायाममा स्थानीय तरकारी उत्पादक कृषकहरुले समस्या झेल्दै आएका छन् । यसअघि खोलामा ‘ह्युमपाइप’ राखेर सडक संचालन गर्दै आएकोमा वर्षायाममा हरेक वर्षजसो भेलबाढीले सडक बगाउने गरेको छ ।

सपना निर्माण सेवाका प्रतिनिधि गुप्ताले सम्झौता अवधिमै पुल निर्माण सम्पन्न पूर्वाधार विकास कार्यालयलाई हस्तान्तरण गर्ने गरी काम भइरहेको बताउनु भयो । पुल ४० मिटर लम्बाइ र ११ मिटर चौडाईको हुने उहाँले जानकारी दिनुभयो ।