थाहाको क्वारेन्टाइनमा रहेका ४ जनामा कोरोना संक्रमण, यस्ताे छ नालीबेली

थाहा नगरपालिकाको बज्रवाराहीस्थित क्वारेन्टाइनमा रहेका ४ जनालाई कोरोना संक्रमण पुष्टि भएको छ । हेटौंडास्थित प्रयोगशालमा पिसिआर विधिबाट स्वाब परीक्षण गर्दा कोरनो भाइरसको संक्रमण पुष्टि भएको हो । 

आइतबार कोरोना पुष्टि भएका ४ जनामध्ये २ जना भारतीय नागरिक हुन् । उनीहरुलाइ एक हप्ताअघि क्वारेन्टाइन पठाइएको थियो । थाहा नगरपालिकाको शिखरकोटमा डेरा गरी सिरकडस्ना बनाउँदै हिड्ने एक जना भारतीय नागरिक र उनीसँगै आएका अन्य ३ जनालाई क्वारेन्टाइनमा पठाइएकोमा उनीहरुमध्ये २ जनालाई कोरोना देखिएको हो । 

उनीहरु तराईको जिल्लाबाट काठमाण्डौंका लागि तरकारी बोक्ने गाडी चढेर करिब रातको ११ बजेतिर शिखरकोट आइपुगेका थिए । थाहा ३ का वडाअध्यक्ष राजेश केसीले वडामा कोरोनाको जोखिम क्षेत्रबाट ४ जना आएको खबर पाउने वित्तिकै उनीहरुलाई तुरुन्त क्वारेन्टाइनमा पठाउने व्यवस्था गरेका थिए । उनीहरु शिखरकोटबाट ट्याक्टर चढेर बज्रवाराही क्वारेन्टाइन गएका थिए । 

आइतबार कोरोना देखिएका अर्का २ जना थाहानगरपालिकाकै स्थायी बासिन्दा हुन् । गत साउन १८ गते लागुऔषध ओसारपसारको आरोपमा पक्राउ परेका ३ जनामा हेटौंडामा कोरोना परीक्षण गर्दा पोजिटिभ भेटिएको थियो । पुनः परीक्षण गर्दा २ जनामा नेगेटिभ आएपछि जिल्ला प्रहरी कार्यालय मकवानपुरले थुनावा कक्षमा भीडभाड हुने भन्दै इलाका प्रहरी कार्यालयको नियन्त्रणमा रहने गरी घर पठाएको थियो । पालुङ आएपछि उनीहरुलाई बज्रवाराही क्वारेन्टाइन पठाएकोमा उनीहरुको स्वाब परीक्षण गर्दा कोरोना पोजिटिभ देखिएको हो । 

संक्रमण पुष्टि भएका चारै जनालाई हेटौंडास्थित आइसोलेसनमा पठाउने तयारी थालिएको छ ।