गठबन्धनका मिना कुमारी लामा हेटौंडाको मेयरमा उम्मेद्बारी ।

पाँचदलीय गठबन्धनबाट नेकपा (एकीकृत समाजवादी) को भागमा परेको मकवानपुरको हेटौंडा उपमहानगरपालिकाको मेयरमा  सो पार्टीबाट मिनाकुमारी लामा उम्मेदवार बन्ने भएकी छन् ।

एकीकृत समाजवादीको पदाधिकारी बैठकले लामालाई हेटौंडाको मेयरमा उठाउने निर्णय गरेको हो । लामा वर्तमान उपमेयरसमेत हुन् । एकीकृत समाजवादी नगर समितिले पार्टी जिल्ला उपाध्यक्ष लामासहित जिल्ला अध्यक्ष श्रीधर पोख्रेलको नाम सिफारिस गरेको थियो । लामाले मेयरमा टिकट पाउँदै नयाँ इतिहास पनि बनाएकी छन् । मकवानपुरको स्थानीय तहको प्रमुखमा टिकट पाउने लामा पहिलो महिला नेतृ बनेकी छन् ।

आगामी ३० वैशाखमा हुने स्थानीय तहको चुनावमा गठबन्धनकी साझा उम्मेदवार बन्ने लामा हेटौंडाको प्रमुखमा निर्वाचित भए, पहिलो महिला प्रमुखको रुपमा इतिहास बनाउने छिन् । सत्ता साझेदार पाँचदलीय गठबन्धनबाट लामा मेयर लड्दै छिन् । गत निर्वाचनमा एमालेबाट उपमेयर उठेकी लामाले २३ हजार ४ सय ३७ मत ल्याउँदै नेपाली कांग्रेस र माओवादी केन्द्रबीचको गठबन्धनका उम्मेदवार बलराम बललाई पराजित गरेकी थिइन् ।

‘मकवानपुरमा यसअघि कुनै पनि महिला नेतृ स्थानीय तहको प्रमुखको उम्मेदवार पनि भएका छैनन्,’ बागमती प्रदेशसभा सदस्य मुनु सिग्देलले भनिन् । लामाले एमाले विभाजनपछि बनेको एकीकृत समाजवादी रोजेकी हुन् । लामा तत्कालीन नेकपा एमालेदेखि नै स्वास्थ्य तथा जनसंख्यामन्त्री विरोध खतिवडा निकटकी हुन् ।

लामाले मेयरमा उम्मेदवारी दिन हेटौंडा उपमहानगरको उपमेयरबाट राजीनामा पनि दिएकी छन् । लामाले मेयर हरिबहादुर महतसक्षम राजिनामा बुझाएकी हुन् ।